IT業界資訊媒體

【史上最低成本騙案】靠一張相呃走你張信用卡

好多人用電腦,都唔鍾意記啲hotkey,又係嘅,好多嘢都可以用隻滑鼠左右掣做晒,又真係無乜理由記埋啲 Ctrl+C 同埋 Ctrl+V 嘅複雜組合嘅,不過千祈唔好睇少呢啲組合,有時就係靠佢哋救命!

點解咁講?話說最近防毒軟件商 Malwarebytes 喺 twitter 出咗篇貼文,話喺卡塔爾、阿聯酋、安曼、科威特同埋法國等國家發現同一類騙案,中招嘅電腦會打開一張相,張相就會「顯示」一個 Windows 10 嘅畫面,扮係用緊全屏幕模式嘅 Chrome 瀏覽器,去咗一個當地嘅警方網站,由於呢個瀏覽器畫面只係一幅圖嚟,所以無論你點撳畫面上嘅嘢都唔會有反應,令你以為部機 lock 死咗。

而喺呢個假網站畫面上列出嘅訊息,大致上就係話你去過唔知乜嘢非法網站,睇過唔知乜嘢咸相,而家警方查到,所以會即時lock死你部電腦唔俾用,除非你即刻喺唯一入到嘢嘅欄位輸入信用卡資料交罰款,否則就唔使旨意用得返部機……如果你一時唔為意真係照做,咁你嘅信用卡資料就會俾黑客收集咗,用嚟直接買嘢又得,賣俾其他人又得,總之就損失慘重啦!

聽落好似好低能,靠一張相就呃到人?但你都唔好睇少佢,當你拉隻滑鼠去邊都 click 唔到嘢嗰陣(因為佢真係一張相嘛),而自己又真係心虛,一時情急你真係會以為自己中咗招,而乖乖哋交罰款了事,不過只要冷靜諗真啲,呢個世界仲有鍵盤呢樣嘢,只要撳 Alt+Tab 就可以出返去啦,或者撳 Ctrl+Alt+Del 就可以呼喚 Task Manager 出嚟,將顯示相片嘅程式關掉,就乜事都冇發生過,所以你話,記得一個半個 hotkey 係幾咁緊要!

資料來源:https://bit.ly/36B7v7E

相關文章:【星戰終章】詐騙案的崛起!

 

Privacy Preference Center