IT業界資訊媒體

【反跟蹤】下載新 Firefox、Chrome 阻截 cookies 追蹤強化密碼保護

Firefox、Chrome 瀏覽器用家有福喇,兩個瀏覽器都同時提升咗網絡保安功能,等用戶可以減少被人跟蹤自己嘅上網足迹,同時亦可以強化密碼管理能力,快啲裝嚟用啦。

隔絕追蹤標記

雖然兩個瀏覽器喺網絡安全性上都有提升,不過當中以 Firefox 比較強,所以就先嚟睇下有乜新改動。Mozilla 嘅 Firefox 新加入反跟蹤防護功能,借助 Disconnect 嘅開源工具,令超過 1000 間專門追蹤互聯網用戶活動嘅公司,無法再通過讀取 cookies 嚟跟蹤用戶及收集個人私隱。Firefox 亦將桌面版瀏覽器嘅 Facebook Container 擴充功能升級去第二代,將 網絡活動放喺一個獨立虛擬空間運行,每當去到一啲原本放有「Like」或「Share」按掣嘅網站時, Facebook Container 就會自動將按掣背後的程式碼隔離,等 Facebook 無法透過呢啲按掣去記錄用戶嘅瀏覽足迹。

另外, Firefox 同時強化桌面版嘅密碼管理工具,將行動裝置版本嘅 Lockbox,變成桌面版嘅 Lockwise;又推出電郵管理工具,如發現用戶使用嘅電郵出現喺資料外洩事件之中,就會即時發出警報,咁用戶就可以第一時間修改密碼,減少帳戶俾盜取嘅風險啦。

Google 方面新推出嘅 Chrome 75 主要係強化咗密碼使用方面,每當開新帳戶或改變密碼時,Chrome 都會提供「Suggest Strong Password」功能,自動為用家生成一個強密碼並儲存起瀏覽器上,咁用家就唔使擔心要自己死記呢啲咁複雜嘅密碼喇。不過, Chrome 75 暫時只得 Android 版本,iOS 版就要等多幾個禮拜。

資料來源:https://bit.ly/2Wkp71y

相關文章:【會員福利】Firefox Lockbox 密碼管理器推出 Android 版