IT業界資訊媒體

【勒索軟件肆虐】約翰內斯堡停電 12 小時

勒索軟件事故頻頻,而且愈來愈大鑊,只計美國就有多個市政府、大學、醫院遭殃。最近南非第一大城市約翰內斯堡嘅電力公司 City Power 亦遭受攻擊,網絡系統、資料庫、應用程式全數被打包,更有部分用戶要忍受停電近 12 小時,非常濕滯。

City Power 透過 Twitter 公告,公司遭受勒索軟件攻擊,資料庫、應用程式及網絡系統均被加密,ICT 部門正在清除惡意程式及重啟所有受影響嘅應用程式。而受到今次攻撃影響,City Power 客戶無法透過預繳系統進行交易。雖然發電廠已經緊急調派人力維修,不過連系統都唔 work,所以維修進度大受影響。

最慘嘅係,出事之日,正正係南非大多數打工仔嘅出糧日,好多人都要趁出糧日去買下個月嘅用電,部分用戶被迫停電近 12 小時,而依家正值南半球嘅冬季,夜晚得攝氏幾度,真真正正叫雪上加霜。

據報導,現時 City Power 已經逐步修復系統及應用程式,用戶亦開始恢復供電。喺近幾年,勒索軟體肆虐,各地政府及公共服務接連遭殃。經濟損失每每以百萬計,最大問題係影響市民生活,嚴重起來,分分鐘搞出人命!奉勸政府及相關機構要立即回應,強化網絡安全措施,製訂應變計劃,切勿掉以輕心。

資料來源:https://bit.ly/2MiZ3Td、https://bit.ly/2GyaX85

相關文章:【暴風雨前夕】亞太區供電 ICS 系統被鎖定 黑客隨時斷電製造火災