IT業界資訊媒體

【切勿模仿】唔想測驗 中學生借刀攻擊學校 Wi-Fi

天下間,其實有幾多人鍾意測驗?大多數人會被逼就範,含淚苦讀,但總有學生會諗辦法做逃兵,逃得一次得一次。美國新澤西州就有兩個年僅 14 歲嘅學生,諗到利用黑客技術去攻擊 Wi-Fi 網絡,逃避測驗。

喺三月尾,二人就讀嘅 Secaucus High School 突然遭受網絡攻擊,學校嘅 Wi-Fi 網絡被癱瘓,搞到教師連唔到線,進行唔到測驗及講課,非常困擾。雖然無講到原因,但校內有教師估到係邊個做,而呢兩個小朋友亦好大方咁承認咗。既然件事東窗事發,呢兩個小朋友好快就被補,經警方調查後,發現當日學校嘅 Wi-Fi 網絡突然湧入大量數據,導致系統無法負荷,相信呢次攻擊好大可能同 DDoS 有關。

問題嚟嘞,兩個中學生竟然識得用黑客技術去攻擊無線網絡?究竟點樣做到?原來實情係通過暗網 (Dark Web)僱用或購入相關「服務」,「借刀」攻擊學校。技術上,佢哋絕對唔係 hacker,肯定唔係因為技癢而嘗試去攻擊網絡。

事件再次顯示,以現今技術,要發動網絡攻擊絕對係容易過去街市買棵菜,只要你識得搵地下市場就得。至於兩個小朋友攻擊學校網絡嘅原因,純粹係唔想返學同測驗咋。換轉件事喺香港嘅超密集式測驗考試教育制度下,學校嘅網絡咪好唔得閒?

資料來源:https://cbsloc.al/2YMqhFv