IT業界資訊媒體

【全民抗疫】貢獻電腦資源 計出新冠病毒弱點

提到借用大量其他人嘅電腦硬件資源,去達成某個目標,可能大家會即時諗起黑客操控殭屍大軍發動嘅 DDoS攻擊或挖礦(cryptomining)。事實上,借用其他人嘅電腦硬件資源唔一定要作奸犯科,而係可以集合大家嘅力量為人類謀求福祉。好似新型冠狀病毒,現時就有廿幾個計劃需要「眾籌」硬件資源,以早日搵出病毒嘅弱點及研製疫苗嘅方法,不過所謂嘅眾籌唔使實物捐獻,只要讓出部分電腦運算能力就得㗎喇。

[email protected] 眾籌電腦硬件資源計劃,其實早喺 2000 年出現,呢個計劃由史丹福大學 Pande Lab 所主導,目的係借用網民嘅電腦運算能力,去模擬蛋白質嘅折疊過程,以了解多種疾病嘅起因及發展。點解要走去研究蛋白質呢?因為佢係人類細胞構成嘅主要成分,只要出現不正常折疊,就有可能發展成錯誤形狀,同埋會影響埋其他正常嘅蛋白質,逐漸發展成各種疾病,當中好似癌症、腦退化症及病毒,就有需要模擬蛋白質各種折疊狀況,先了解到上述疾病嘅出現原因及治療方法。而喺今次新型冠狀病毒疫情上,由於仲未搵到病毒表面蛋白質同肺部細胞蛋白質嘅結合機制,所以就未研究到有效嘅疫苗。有見及此,[email protected] 喺較早前已開展咗 3 個專門針對新冠病毒嘅研究計劃,而最近更發展至 23 個,希望可以加快研究進度,盡快研製有效疫苗。

想參加呢個計劃?其實唔難,只要你喺連接住互聯網嘅電腦上安裝 [email protected] 專用軟件,系統就會自動將工作送交你嘅電腦演算。擔心會影響你部機嘅效能?其實軟件主要會喺你部電腦閒置時先啟動 CPU 或 GPU 嚟做嘢,而且你亦可以喺設定入面揀選捐獻限制,所以唔會大幅拖慢你部電腦。當然最理想係如果你有部舊機無用,就可以直接用呢部電腦嚟裝 [email protected],咁就唔怕整慢你部機啦!

資料來源:https://bit.ly/3aR10zo

相關文章:【大小通吃】食物銀行中勒索軟件 無錢交贖金要靠眾籌方法

 

Privacy Preference Center