IT業界資訊媒體

【便宜莫貪】小心變咗條「蒸魚」!

最近有黑客利用人嘅貪念,推出輪盤式遊戲,免費送參加者電腦遊戲平台 Steam 嘅遊戲,其實背後就係釣魚圈套,名副其實 Steam Phishing,中咗招就真係變咗條「蒸魚」,任人魚肉。

貪心仔首先會被引誘去輪盤式遊戲,無論你平時幾咁「黑仔」都好,今次你都一定會中獎。然後,網頁就彈出提示限你 30 分鐘內登入 Steam 帳戶登入及密碼,領取你嘅獎項,同時為咗加強可信性,又會通知你要 24 小時後先可以再參加,做騙徒都要做得專業,目的自然又係偷取你嘅 Steam 帳戶憑證。當你輸入晒資料,再㩒「Login via Steam」掣,就會將你寶貴嘅 Steam 帳戶送俾黑客,「蒸魚」就大功告成。

比較有心思嘅係,今次條 URL 連結用咗 URL shortener 做 mask,好似喺條唔新鮮嘅蒸魚眼上鋪啲蔥花,感覺上難分啲。另外,當你個 Steam 帳戶被騎劫之後,黑客就會幫你將咁好玩嘅遊戲 send 俾你啲 friend,令更多人中招。

正所謂光棍佬教仔,便宜莫貪,邊有咁大隻蛤乸隨街跳㗎。

資料來源:https://bit.ly/2WWpSyb

相關文章:edvance 特約【wepro 教室 09】嘉倩 180 ─ Phishing