IT業界資訊媒體

【侵侵再輸一仗】英政府有條件使用華為設備

由拘捕孟晚舟嗰一刻開始,就知道侵侵政府下定目標,要打擊華為(同埋中國政府)喺電訊設備市場嘅地位,而且侵侵仲不斷拉攏盟友,向華為說不!不過,英國政府正式發新聞稿,表示會「有限度」採用華為設備,侵侵呢個算盤打唔響喇。

呢單消息公布之前幾個禮拜,美國政府已經派出副國家安全顧問 Matt Pottinger 組成嘅代表團出訪倫敦,出力做游說工作。國務卿蓬佩奧、財長努欽亦不停喺國內發表言論,指華為設備對國家安全構成威脅,英國國會亦熱烈討論呢單嘢,結果都係唔能夠令英國跟隨美國步伐,對華為進行制裁。

過去兩年,侵侵極高姿態向「五眼聯盟」盟友(澳洲、新西蘭、加拿大、英國),以及北約盟友(包括德國等歐洲國家)表示,唔應該採用華為設備嚟興建 5G 網絡,以免俾中國政府竊取數據,同時亦不停透過傳媒報導華為勾結北韓、協助打擊疆獨分子、向伊朗出售設備等新聞。而喺英國決定用華為設備後,都仲有三個參議員去信英國政府,話唔想喺英國脫歐之際,重新審視英美自由貿易協定,同埋兩國情報交換機制,希望英國政府三思。

但係睇返今次英國嘅決定,查實考慮得幾周詳:首先所有用嚟傳送數據嘅核心 5G 網絡設備並唔會採用華為,市民有機會用到嘅網絡,華為都只係負責少量機站同埋天線;至於敏感度較高嘅地方例如軍營等等,華為更係唔可以參與,總之英政府就將華為嘅市場佔有率限制喺 35% 以下,確保其他公司如 Nokia、Ericsson 等可以齊齊分一杯羹,算係平衡晒各方面嘅考慮,將潛在風險減至最低。美國嘅輿論就唔係太敢大肆抨擊英政府嘅決定,始終都對兩國緊密關係有所顧忌,同埋希望呢個唔係最終決定,英政府仲有機會改變主意。

唔單止英國,就連德國都陷於兩難情況,無論用唔用華為,就會得失中美其中一方,可能要承受巨大嘅經濟壓力,所以到呢刻都未決定到,而意大利亦傾向學英國「有限度」使用華為設備。歐盟同埋英國國家網絡安全中心亦一齊發出指引,點樣可以同高危廠商(冇指明道姓係華為嘅)一齊興建電訊網絡,仲提供咗可行方法俾其他國家去跟隨;就連美國自己都鬆咗手,國防部阻止咗商貿部禁止當地企業售賣零件俾華為嘅決定,話晒華為每年向美國企業買入110億美元零件,貿然禁賣會令呢批公司減少科研投資,變相令國家失去科技競爭力。

從以上事例可見,用定唔用華為,睇嚟真係唔容易決定,到底美國係唔係真係會制裁採用華為嘅國家?英美兩國關係跟住會點?就要看下回分解!

資料來源:https://bit.ly/2RSidC0

相關新聞:【侵侵入侵】大量侵侵主題程式蒲頭