IT業界資訊媒體

【侵侵入侵】大量侵侵主題程式蒲頭

最近有研究人員就發現,全球出現咗好多同美國總統「侵侵」特朗普有關嘅程式,當然呢啲程式唔係啲健康有益嘅嘢啦,而且專家仲話,有證據顯示係同一班人做。起初佢哋會扮係Visa嘅全球危機總監,發個電郵兇你,話你銀行戶口被盜用之類,然後叫你開附件嘅有料檔案,等你部電腦中惡意軟件。

不過唔知係咪條橋用到爛晒,定係美國總統大選將近,後嚟呢班黑客開始侵侵上身,製作唔同嘅惡意程式,次次都內嵌埋侵侵個樣,例如侵侵出嚟話你部電腦嘅重要資料已鎖住唔用得,要你交贖款;又例如突然喺屏幕出現侵侵個樣,一撳佢就lock死個螢幕唔用得,繼續撳就不停出唔同侵侵畫面,諗起都覺得恐怖!仲有隻叫做Trump Crypter嘅勒索軟件,唔小心打開就附送侵侵大頭相閃卡一張,實際上會加密你電腦內嘅檔案,以避過防毒軟件嘅偵測。

專家仲發現咗樣有趣事,除咗呢批有毒程式,仲有啲冇毒嘅都會用侵侵嚟做招牌,例如有隻叫Trump’s Cyber Security Firewall,開頭研究人員都以為係毒嘢,點知研究完先發現佢係好嘢,係幫系統管理員搞好Windows設定嘅。不過唔理好醜,但凡出現侵侵樣,都係小心為上,除非你真係好鍾意成日對住侵侵啦!

資料來源:https://bit.ly/2KnxUg1

相關文章:【侵侵叻返次?】4G/5G 網絡首次發現漏洞