IT業界資訊媒體

【使錢最叻】 Microsoft 公布亞太區人工智能應用調查 香港只得花費一項取勝

人工智能(Artificial Intelligence)嘅應用係大勢所趨,對大中小企業都一樣幫到手。 Microsoft 亦積極喺 Azure 雲端服務打造人工智能應用平台,助客戶快速將應用上雲。而原來 Microsoft 喺四大項目上,人工智能已達到人類同級,甚至超越人類,到底喺邊四方面呢?

改變公司文化迎接人工智能

早前 Microsoft 聯同調查機構 IDC,發布《迎接未來機遇:人工智能激發亞太區增長潛力》研究報告,收集咗 14 個亞太區市場 1605 個企業管理層及 1585 個員工對人工智能嘅睇法,當中再抽中香港 100 個企業管理層及 101 個員工嘅意見,用嚟比較香港喺亞太區嘅人工智能應用情況。結果發現,香港雖然已有 40% 機構開始應用人工智能科技,而且喺未來三年時間,可有助企業提升 2.6 倍競爭力,但喺各大評分中只得投資一項稍勝亞太區人工智能應用嘅領先地區,而喺策略、基建、文化、能力上都遠低遠落後,簡單啲講即係錢花不得其所。

【使錢最叻】 Microsoft 公布亞太區人工智能應用調查 香港只得花費一項取勝
Microsoft 香港及澳門區總經理陳珊珊表示,調查結果顯示企業管理者與員工均認同人工智能有助更完善地完成現有工作,但她指出要讓人工智能為企業提供勞動力,並不能單靠科技,還要改變公司文化。

會上 Microsoft 香港及澳門區總經理陳珊珊表示,香港要加快人工智能嘅發展,必須著力改善公司管理層及員工文化,以及培育創新及鼓勵員工持續學習,雖然調查中顯示有 87% 嘅企業喺未來兩三年會優先協助員工學習新技能,不過直至現時仍有 73% 企業未有相關計劃嘅具體內容。 IDC 亞太區定制解決方案副總裁林宣宏亦指出,管理層與員工對學習人工智能嘅看法亦有很大差異,有 27% 管理層認為員工無興趣學習新技術,但實際上只得 17% 員工對學習新技術表示無興趣。

Microsoft 人工智能超越人類

今時今日,其實各大雲服務供應商都標榜人工智能,好似 IBM 嘅 Project Debater 喺辯論比賽上同人類打成平手、華為嘅 ModelArts喺史丹福大學 DAWNBenchmark 圖像識別訓練奪得全球第一名。 Microsoft 又有邊樣實際戰績呢?原來 Microsoft 係其中一間最早以訓練人工智能系統、做出同人類同等(Human Parity)甚至超越人類能力嘅機構,例如喺視力方面, Microsoft 已喺 2015 年嘅 ImageNet 賽事中超越人類嘅視力,而喺中譯英嘅機器翻譯,以及語音辨識上,準確度亦同人類一樣。不過, Microsoft 就表明只會著力開發人工智能應用平台,令開發者提供適合嘅工具加速開發人工智能應用,而絕對唔會開發一啲同客戶存在競爭嘅應用方案,即係只會專注做大個市,加速人工智能嘅普及程度。

相關文章:【矛盾大對決】用 AI 去攻 AI 會點呢?