IT業界資訊媒體

【低科技破解】熱溶膠攻陷 OnePlus 7 Pro 光學指紋解鎖系統

OnePlus 7 Pro 係 OnePlus 新推出嘅旗艦級手機,6.67 吋超大全屏幕顯示、90 Hz 畫面更新率,對鍾意打機嘅機迷嚟講自然有超大吸引力。不過,推出無耐,佢嘅屏下光學指紋感應同樣逃唔出被破解嘅命運,似乎指紋解鎖都唔係百分之百安全!

新旗艦機性價比強

OnePlus 手機一直以性價比高為賣點,機能強,價錢合理,贏得唔少追求手機功能嘅進階手機迷掌聲。最新推出嘅旗艦級手機 OnePlus 7 Pro,配備最新嘅 Qualcomm Snapdragon 855 處理器、Adreno 640 圖像處理晶片、8GB RAM 同埋 256GB 內存(另有其他配置版本),再加上超高質素彈出式自拍鏡頭,而索價只係 $6,498,比起 Apple 及 Samsung 嘅同級機款平得多。不過,推出唔夠半個月,佢嘅屏下光學指紋解鎖系統已經被破解,同樣俾定形膠所輕易擊倒。 Max Tech 網站只係用咗熱溶膠、錫紙及白膠漿作為工具,首先唧熱溶膠落膠紙上,再用機主嘅手指壓喺熱溶膠上複製指紋,之後再用覆蓋一層白膠漿上去就完成,然後將呢塊假指紋放喺感應器上,半秒唔夠就成功解鎖!

【低科技破解】熱溶膠攻陷 OnePlus 7 Pro 光學指紋解鎖系統
OnePlus 7 Pro 嘅硬件配置強勁,不過屏下光學指紋系統就在在漏洞,可以俾熱溶膠複製嘅指紋瞞過。
OnePlus 7 Pro VS 3D打印?

雖然解鎖方法被破解咗,但有白帽黑客就話其實呢個方法唔多可行,因為首先要目標人物將手指放喺熱溶膠上先可以套取到指紋,試問邊個會咁做呢?順帶一提,網站記者用相同手法去嘗試解鎖 Samsung S10,但呢個方法就唔成功。但如果大家仲有印象,相信都記得 Samsung S10 早前亦被黑客破解超聲波指紋解鎖系統,方法係製作立體指紋圖像再用 3D 打印出嚟,呢種方法只要用手機影低機主印喺玻璃杯上嘅指紋已經成事,唔知用嚟對付 OnePlus 7 Pro 嘅光學解鎖系統又得唔得呢?

資料來源:https://bit.ly/2X7Xlqr

相關文章:【大件事】Samsung S10 漏洞 3D 打印指紋輕鬆解鎖