IT業界資訊媒體

【下載保平安】iOS 13 更新未出先興奮 三招守護個人私隱

Apple 喺香港凌晨時份舉行咗一年一度嘅 WWDC 開發者大會,公布新 Mac Pro 同埋 iOS 13 新功能。新系統唔單只提升咗運作速度、加入 Dark Mode、強化影相及編輯功能,我哋最關心嘅當然係保護個人私隱上會有乜新搞作。Apple 今次就透過三招,大大提高保護能力,但最慘就係一班應用程式開發者,隨時要重新設計過晒登入版面。

新招一:Sign in with Apple ID

登記新帳戶時,通常都要輸入自己嘅電郵地址同埋設定密碼,就算你每個新帳戶都用同一組電郵地址同密碼登記,每次都要輸入真係費時失事,所以當 Single Sign On (SSO) solution 推出後即時大受歡迎,因為每次都可以用 Facebook、Google 帳戶嚟登記及登入新帳戶,成件事即時簡單晒。不過,用呢啲帳戶嚟做 SSO ,由於要提供自己嘅電郵或社交平台帳號,資料有機會俾廣告商使用,所以唔係人人都樂意。

今次 Apple 新推出嘅 Sign in with Apple ID 功能,可以俾用家使用 Apple ID 嚟登記及登入新開設嘅帳戶。不過,Apple 會俾用家選擇用唔用自己 Apple ID 嘅電郵帳戶嚟登記,如果唔想俾,Apple 會自動幫你整個虛假電郵地址出嚟,而且係每登記一個新帳號都有唔同地址,收到嘅電郵認證會自動 forward 去你嘅真電郵郵箱,咁就唔怕俾對方攞到你嘅個人資料啦!唔單只咁,就算其他人有你嘅 Apple ID 密碼,都唔可以幫你登記新帳戶,因為登記時仲要用你嘅指紋或人臉做驗證,完全做到雙重保障。

對用家嚟講係好事,但 iOS app 開發者就麻煩嘞,因為 Apple 要求開發者加入呢項功能,特別係已經提供緊 Facebook 或 Google 帳戶登入嘅話,仲強制佢哋一定要加添。由於已經開放俾用家用呢啲帳戶嚟做 SSO,開發商基本上無得揀而要焗加,所以登入版面肯定要重新設計加多粒掣,好在距離 iOS 13 推出仲有一段時間啫。

新招二:Siri 智能攔截來電

而家接得最多嘅電話,一定係廣告、貸款、詐騙來電,雖然可以通過安裝來電拒接 app 嚟做攔截,但通常都攔唔晒。 iOS 13 就加入咗 Siri 人工智能攔截功能,啟動後,只要來電唔喺聯絡人清單之上, Siri 都會幫你將來電直接飛去留言信箱,連來電通知都唔會喺屏幕顯示。而為咗避免過度攔截,封鎖埋一啲未趕得切加入聯絡人清單嘅電話,所以 Siri 會搜尋埋通話記錄、訊息、電郵內容,只要有呢啲電話號碼,都唔會自動飛線。至於實際上有幾勁,就要等推出後試試。

新招三:限制地理位置分享

唔少 app 喺安裝時會要求讀取用家嘅地理位置,以推送更貼身嘅資訊,例如天氣 app 會提供實時位置天氣報告,消費 app 會搵出附近嘅店鋪優惠或飲食推介等等。有部分 app 一定要用家開放分享地理位置權限先可以安裝,雖然用家事後可以去「私隱」>「定位服務」內修改權限,但就比較麻煩。Apple 今次就提供「一次性」選項俾用家喺登記時使用,之後應用程式再要求讀取位置,系統就會彈出訊息通知用家;同時系統亦會於每隻 app 喺背後使用地理位置時彈出通知,增加私隱透明度,方便用家修改分享位置權限。另外,上載去社交平台嘅相片,亦可以俾用家選擇隱藏地理位置,再加上 Apple 亦限制咗應用程式透過 Wi-Fi、藍牙裝置讀取用家位置,唔使驚洩露自己嘅行蹤。

有咗以上功能,個人私隱將會進一步得到保障。根據過往慣例,新 iOS 都會喺新 iPhone 推出時一併更新,即係大概 9 月左右。如果你係 iPhone、iPad 用家, iOS 13 推出嗰陣你會唔會即刻更新呢?

資料來源:https://apple.co/2WoT7hJ

相關文章:【有片】一分鐘睇盡 Apple Card 保安功能