IT業界資訊媒體

【一朝致富】懸紅100萬美元 Apple 搵人入侵 iPhone

每年 9 月,都係生果界嘅特別日子,事關 Apple 會喺 9 月第二或第三個星期開發布會,公布新一代 iPhone 嘅詳情。雖然而家先 8 月中,不過好多「接近蘋果消息人士」開始陸續蒲頭,「預測」緊 iPhone 11 嘅新玩法。由於無得 Fact Check,所以真係唔好太認真,當趣聞睇下就算啦!

唔經唔覺,iPhone 已經出咗 12 年,可以話改變晒成個世界嘅生態,以前要靠電腦做嘅嘢,而家用手機已經搞掂。不過咁亦衍生一個問題,黑客由以往針對電腦攻擊,慢慢轉移落 iPhone,尤其係近年 iPhone 功能愈加愈多,可以針對嘅漏洞亦變相多咗,好似近期最多人討論嘅 Face ID 登入漏洞,只係用一副特製眼鏡,就可以成功瞞騙 Face ID 嘅 liveliness detection(用嚟測試鏡頭前面係唔係真人),你話幾咁危險!再加上之前 AirDrop 同埋iMessage 功能存在保安漏洞,都真係幾影響 Apple 嘅商譽同銷量。

為咗早日發現及堵塞漏洞,所以 Apple 啱啱就公布咗懸紅 100 萬美元,只要有黑客證明到佢可以破解到 iOS,就可以拎走筆獎金,實行以黑制黑。雖然呢種方法唔算創新,例如好多企業都會聘請白帽黑客(white hat)嚟測試系統保安漏洞,不過好似 Apple 咁大手筆就真係相當有吸引力,試諗下之前只係出 20 萬美元獎金,已經吸引到黑客搵出 50 幾個bugs,所謂重賞之下必有勇夫,相信將有更多漏洞被搵出嚟。

有業內人士估計,如果多幾間大企業肯好似 Apple 咁疏爽,好有可能令唔少黑客轉行做白帽黑客,事關有唔少黑客都係求財,合法搵錢又證明到自己實力,何樂而不為?

資料來源:https://bit.ly/300SqJs

相關文章:【叻仔!】19 歲小子捉蟲賺過 100

 

Privacy Preference Center