IT業界資訊媒體

【一卡成名】Apple Card 首名受害者誕生!

號稱保安性極高嘅 Apple Card,推出無耐,已經出現咗首個被盜用簽帳嘅個案喇。受害人 David 打去 Apple 尋求協助,但獲得嘅回應竟然係話佢哋都唔知點解可以發生,而且一張卡同時出現喺兩個地方實在太奇怪。可能你會問,複製咗就得啦好難咩?咁我哋就首先回一回帶,睇吓 Apple Card 有乜咁巴閉先。

Apple Card 分為實體及虛擬卡,鈦金屬製嘅實體 Apple Card ,卡身只係得晶片同埋帳戶名稱,信用卡號碼、CVV保安號碼、到期日以及簽名位完全被消失,所以就算想複製張卡都唔係易事,而且就算俾人執到呢張卡,想用嚟網上購物都唔得。至於虛擬 Apple Card 就收喺 iPhone 嘅晶片入面,每次消費亦需要配合 FaceID 或 TouchID 先可以完成交易,而每次交易會以一次性動態密碼加密,確保 Apple 唔會知道你嘅消費內容。

好嘞,既然有以上嘅保安措施,所以 Apple 方面現階段亦理解唔到複製信用卡呢件事係點發生。而更怪異嘅係,根據受害者透露,Apple Card 被盜用時佢部 iPhone 彈出簽帳通知,話呢單交易係喺附近發生,但打開 Wallet 入面 Apple Card 嘅簽帳位置記錄,就發現實際上簽帳位置喺九里遠!所以真係好難理解。

現時 Apple 仲未調查到事件嘅真相,而專家就話 Apple Card 雖然係安全啲,但都唔係完全複製唔到,所以都係建議用家簽帳時盡量用 Apple Pay,至於張實體 Apple Card,都係袋返喺銀包入面算喇!

資料來源:https://bit.ly/31ZX7Ek

相關文章:【有片】一分鐘睇盡 Apple Card 保安功能

 

 

Privacy Preference Center