今年 4 月初，中國國內出現一隻勒索軟件 WannaRen，中招者不單自己部電腦出事，就連同一內聯網嘅電腦都會受感染。由於個名同著名勒索軟件 WannaCry 相似，所以就有人懷疑係咪同一黑客所為？不過，經過內地網絡安全公司調查後，發現隻勒索軟件係用「易語言」嚟寫，所以相信絕對有可能係中國人所為。奇就奇在，製造呢隻惡意軟件嘅黑客喺幾日後，自動上載解密器俾人解密，完全唔使俾之前話要收嘅贖金，到底搞邊科？點解又同北韓金仔有關呢？ 其實今次金仔都好無辜，因為同佢又無直接關係，只係黑客將金仔嘅漫畫黑客造型放咗喺 WannaRen 勒索軟件嘅主介面咋。對於 WannaRen 事件，國內安全服務公司火絨安全有詳細來源去脈報導。簡單嚟講，就係 WannaRen 喺知乎、貼吧、微博上突然成為熱門討論話題，以及出現好多受害者後，火絨就開始對呢隻勒索軟件進行源頭追蹤。發現原來黑客係利用 Windows 系統嘅 EternalBlue 漏洞嚟發動攻擊，只要中咗毒，WannaRen 就會由 C&C 伺服器下載及安裝挖礦軟件同勒索軟件，同時感染其他電腦。而且編寫代碼係用中文嘅易語言，所以否定咗同…