香港人壓力咁大，男士們少不免會去睇下鹹網減壓，不過防毒軟件商 ESET 最近就發現咗有隻叫 Varenyky 嘅新病毒，會偷偷錄起你去鹹網嘅畫面，隨時有可能用嚟勒索你，減壓不成反而仲大壓力，認真慘慘豬！ 其實呢隻病毒都出現咗一段時間，今年五月左右開始喺法國境內活躣，暫時未見佢出現喺其他國家或者地區。最初佢嘅「毒性」好溫和，主要都係針對法國當地用緊 Orange 呢間電訊商嘅客，不外乎用有筍價手機嘅宣傳單張嚟引你注意，冇睇清楚唔小心撳咗入條 link 就中招，手法唔算特別。 ESET 一直監察呢隻病毒，發現佢無時無刻都喺度變種，密密不停加入新功能，而且七月開始亦唔再出手機推廣電郵，而係出性勒索電郵。經過 ESET 專家深入調查，發現佢加咗段程式碼，只要瀏覽器出現 sexe（sex 法語）字眼，就會啟動 FFmpeg 程式，將用家睇緊嘅畫面錄起，然後將段片傳去病毒嘅原伺服器。 雖然仲未知道黑客錄呢段片想點，但好大可能係想拎嚟勒索對方，因為專家發現 Varenyk…