分享FacebookTwitterWhatsAppEmail 呢幾年勒索軟件（Ransomware）肆虐，聞者色變。以往中招者可能只係揀俾唔俾錢攞解密鑰匙，不過而家就多個選擇喇，除咗以上選項，你仲要揀將唔將啲機密檔案銷毀，否則唔單止解鎖唔到啲檔案，仲會網上見添！ 勒索軟件嘅可怕之處，係黑客會將電腦內嘅檔案加密，由於解密鑰匙係基於高級演算法運算出嚟，所以一旦中招，基本上除咗俾贖金之外，都好難靠自己破解。不過，隨住愈來愈多公司重視備份檔案，受害者開始傾向唔俾贖金，於是黑客又再變招，兩大趨勢分別係會狙擊埋備份嘅檔案，以及喺啟動勒索程序前將啲資料偷走，前者等你無備份可依靠，後者就可以恫嚇將資料公開，等你唔俾贖金唔得。 第二招其實已有唔少勒索軟件黑客組織做緊，好似 Maze、Sodinokibi、DopplePaymer、Clop、Sekhmet、Nephilim、Mespinoza、Netwalker 等等，都特登整咗一個網站出嚟，只要對方唔俾錢就將機密資料上載，包括對方客戶嘅個人資料。不過，黑客組織 Ako 就更加狼死，除咗解鎖費用，仲會視乎對方嘅公司規模或行業，要求俾多筆刪除資料費用，Ako 就曾舉例有公司喺繳交 35 萬美元解鎖費用後，要再俾另一筆刪除資料費，費用由 10 萬元至 200 萬美元不等。 「精明」嘅受害者，當然未必會俾晒兩筆贖金啦！Ako 回應傳媒查詢時，就表示有醫療機構選擇只係俾刪除資料費用。相信呢個受害機構係有做好備份，同時衡量過病人資料外洩，就著個人私隱法例嘅賠償金額應該仲大，所以迫於無奈先俾贖金。 隨住勒索軟件不停進化，應對方法除咗加強員工嘅網絡安全意識培訓、做好備份之外，企業亦要做好數據加密技術，以及將其中一個備份設備離線，咁先可以減低勒索軟件嘅破壞力。 資料來源：https://bit.ly/2ZddNcN 相關文章：【雙面人】WannaRen勒索軟件呢頭鎖果頭解

全球政府抗擊疫情，為咗協助市民留守家居抗疫或遙距工作，唔少服務供應商都免費開放收費服務，例如愛情動作片網站 Pornhub 全球免費任睇，YouTube、Netflix 調低串流影片質素，令歐洲市民嘅上網速度保持穩定，Microsoft、Cisco 亦解鎖旗下 Zoom、Webex 網上會議嘅部分收費功能，盡量協助減少病情蔓延。估唔到，有黑客組織喺呢個時候都衝出嚟搶光環，宣布停止對醫療機構發動網絡攻擊，以及同中咗招嘅「拍檔」共度時艱，減少勒索贖款嘅費用，真係「多謝」晒喎！ 解鎖費用靈活有得傾 關於喺新冠疫情期間嘅部署，暫時有三個主要靠勒索軟件搵食嘅黑客組織企出嚟回應。而所謂勒索軟件，就係透過惡意程式將受害者電腦內檔案加密嘅攻擊手法，而且會透過內部網絡擴散，甚至狙擊埋雲端及內部備份。由於解鎖密鑰喺透過加密演算法計算，所以一般好難破密得到。 DoppelPaymer 黑客集團宣稱從來唔要瞄準醫療機構，以及政府嘅911求助熱線。如果有醫療機構不幸中招，佢哋會提供免費解鎖「服務」。不過，條件係要提供證據審查，避免有大型私院假扮小診所嘅情況出現。至於藥物生產商就唔會幫手，因為佢哋話喺疫情期間藥廠已賺咗好多錢，所以免費解鎖呢？不了！ Netwalker Ransomware 同樣聲稱從來唔會瞄準醫療機構攻擊，不過被問到如果有醫院不幸中招又點呢？黑客集團就無直接回應，只係話如果有人被鎖，就要俾錢解鎖。 Maze Ransomware 呢班黑客集團嘅回應就最出位，佢哋聲稱喺疫情期間唔會再對醫療機構發動攻擊。而基於現時全球經濟危機及疫情爆發，佢哋決定向企業伸出援手，向所有人提供解鎖折扣服務，無論係已中招或新加入嘅「拍檔」，都有得傾！ 資料來源：https://bit.ly/3ajCpDh、https://bit.ly/2QFBdm0 相關文章：【賺外快】國家支援黑客 善用工餘時間偷賭客資料