如果問未來最矚目嘅流動通訊科技係乜，十居其九都會答5G同埋物聯網（IoT），華為創辦人任正非月初接受英國《金融時報》訪問，都話美國佬搞完佢哋嘅5G後，下一個戰場就係物聯網，就知呢兩樣嘢幾咁受全世界重視。 不過物聯網有個好大嘅問題，就係物聯網嘅概念係將所有本來上唔到網嘅死物，都搞到佢哋可以駁晒上網，以前就算只得電腦同埋手機可以上網，要搞網絡保安已經唔容易，而家仲所有嘢都上晒網，黑客要入侵更加易而反掌。 舉個簡單例子，之前聽行家講過，有個中小企客俾黑客入侵，check晒全公司網絡都搵唔到個漏洞，最後結果發現原來佢門鎖係連住物聯網，但係因為要識別員工資料，所以又連咗上公司個數據庫，就係咁出事……試想像一下如果公司有幾樣嘢都用緊物聯網，情況會幾失控。 歐洲一間認證機構digital.security就諗到條橋，幫出品物聯網設備嘅公司做認証，只要產品出廠前俾佢哋做25至30個測試，確保產品無論連接其他物件、互通訊息嘅協定、連接嘅伺服器，以及產品內置嘅應用程式，都唔會有保安漏洞，而成個過程會聘請獨立資訊保安專家嚟評估，通過測試就會喺產品貼上IQS（IoT Qualified as Secured）嘅標誌，為期兩年，兩年後要再拎返嚟重新測試先可以續牌，過程都好嚴格，以後要添置物聯網產品時，就記得睇下有冇IQS標誌先好買！