網絡安全資訊平台 HackRead 表示，上月有黑客喺暗網上出售 2.67 億 Facebook 用戶個人資料，但今個月突然激增至 5 億，由於出售嘅資料唔包括登入密碼，所以售價整體嚟講唔貴，三個套餐分別係每十萬個帳戶收450美元、每100萬個帳戶收1,500美元，以及3萬美元一筆過買晒。而喺 5 億帳戶當中，有 290 萬屬於香港用戶，約佔 1/3 港人用戶，大家真係要提高警覺性，防犯嚟緊會有罪犯透過社交工程（social engineering）嚟偷呃拐騙喇！ 今次出售嘅Facebook用家個人資料包括：用戶名稱、姓氏、性別、位置、城市名稱、職業、結婚狀況、電話號碼、電郵地址及帳戶連結，內容非常廣泛，對精於社交工程詐騙嘅罪犯嚟講，已經攞到太多資料，可以假扮成對你有關嘅機構如電訊公司、政府部門、銀行等等，向你發動唔同渠道嘅攻擊，例如釣魚電郵、SMS，甚至盜取你嘅身份作非法用途。 專家透露，相信今次私隱外洩嘅源頭唔係 Facebook，應該係第三方服務供應商或市場推廣公司，由於儲存喺雲端嘅資料庫無做好安全設定，先至會俾罪犯攞到。但專家指出，黑客亦可以透過機械人進行網上爬行，去收集你喺社交平台公開嘅資料，所以勸籲大家千祈唔好公開太多個人資料。HackRead 專家話暫時未知有無人買咗呢啲帳戶資料，但都要小心防範。而除咗香港之外，鄰近地區如澳門、台灣、新加坡，亦分別有41萬、73萬及300萬個帳戶記錄。…