無可否認，企業嘅網絡安全措施做得好，的確可以有效阻截黑客攻擊，不過，黑客亦唔會咁傻仔咁固執，攻你唔入，咪向你嘅第三方供應商落手囉！ 講緊嘅係飛機製造商 Airbus，法新社（AFP）最新報導，兩間有份參與調查嘅網絡安全公司，透露 Airbus 喺最近一年內曾遭受四次大型攻擊，其中兩次係針對佢哋嘅引擎供應商 Rolls-Royce 及 Assystem 嘅子公司 Expleo。法新社引述專家嘅意見，佢哋話雖然 Airbus 有使用 VPN 嚟分隔內部網絡，但佢哋有時亦會允許第三方供應商入嚟做嘢，所以黑客只要能成功攻擊第三方供應商，就可以作為跳板攻入 Airbus。而根據專家嘅調查顯示，黑客進入 Airbus 網絡嘅目的，主要係針對佢哋嘅引擎科技，包括軍用機 A400M 、A350 客機，以及用嚟控制飛機各感應器嘅系統，盜取技術多過想偷個人私隱。…