勒索軟件（Ransomware）的確令人聞風喪膽，小編身邊已有唔少朋友嘅公司中咗招，一日唔提高防禦水平，相信受害者將會普遍到總有一個喺左近。就好似最近一個新開張、專門提及有邊啲公司正受到襲擊嘅 Twitter 帳戶，竟然有大家都識嘅 Bossini、c!ty’super 份，而且仲話黑客要脅只要唔俾贖金，就會公開偷咗嘅資料，唔知你又係唔係佢哋嘅顧客或合作夥伴呢？ 呢個新開張嘅 Twitter 帳戶叫做@ransomleaks，由今年 5 月開始營運，專門喺暗網收集資料，睇吓有邊啲黑客組織喺暗網拍賣盜竊返嚟嘅資料，或喺網站公開受害公司部分機密檔案，作為判定有邊間公司已經中招。到底啲料堅唔堅呢？小編就用咗喺 5 月公報嘅一啲個案嚟驗證，發現好似澳洲物流公司 Toll Group 及奧地利 Weiz 小鎮嘅報導都真有其事，所以今次佢話 Bossini 同 c!ty’super…

以前中咗勒索軟件（Ransomware），衰到極最多都只係攞唔返啲資料，但自從勒索軟件轉咗新玩法，喺鎖死電腦檔案前會先偷走所有數據，一旦企業企硬唔俾錢，黑客就可以用公開資料嚟加強勒索力度，所以勒索軟件就唔再係攞唔返資料咁簡單，隨時觸犯私隱法之餘，亦會大大力打擊商譽，企業關公真係想兜都兜唔返㗎！ 勒索軟件之所以咁乞人憎，係因為採用嘅加密演算法好難破解，再加上好多時企業都無做好 backup，所以一旦內部檔案被加密，企業本身係無能力還原，應對方法之一係當成個系統被砍掉重練，否則就要乖乖被贖金，期望黑客有「良心」送返條解鎖 key 俾你。瀨得嘢多，唔少企業都學識 backup 嘅重要性，搞到黑客搵少好多，於是黑客自然識得變招，除咗會攻擊埋企業嘅儲存裝置或雲端備份，仲會喺發作前盡量將資料偷走，用嚟加強威脅性，就算唔肯俾解鎖費，都要受害企業俾掩口費刪除外洩資料，否則就會喺黑客自己營運嘅網站上公開機密資料，好多時都包括被害公司嘅財務檔案、客戶及員工私隱資料等等，好似之前我哋報導過嘅 Bossini 事件咁，就有大量商業機密同客戶資料網上見嘞。 正因為黑客轉咗玩法，所以有企業已提升咗勒索軟件攻擊嘅應變態度，唔再選擇收收埋埋，轉而當成資料外洩咁公開，一來有啲公司嘅客戶屬歐盟成員國國民，所以受 GDPR 法規約束要通報；二來由於黑客會事先披露，一定有傳媒查上門，如果企硬否認，只會惹來強烈抨擊，進一步損毁商譽，後果等同搬石頭砸自己隻腳，所以有理由相信會有愈來愈多企業企出嚟承認受到襲擊，香港同業亦應該盡快調整一下緊急應變措施喇。 資料來源：https://bit.ly/38MU7PX 相關文章：【大件事】Bossini、c!ty’super成為勒索軟件攻擊目標？

近來唔少人都叫多咗外賣，而喺本地幾間餐飲外送服務中，FoodPanda 係最多人會用嘅其中一間。不過，最近佢哋位於德國嘅母公司 Delivery Hero 就被踢爆，大約 72萬條來自 14 個地區嘅客戶資料由上月中開始喺暗網上瘋傳，內容有客人名稱、地址、電話、密碼，而香港客戶亦榜上有名，受影響客戶除咗要即刻改密碼（包括其他共用同一密碼嘅帳戶）之外，仲要提防相關嘅釣魚電郵或電話詐騙添！ 今次被洩嘅客戶資料來自新加坡、德國、西班牙、芬蘭、意大利、香港、荷蘭、加拿大、澳洲等，而係網上可以下載嘅檔案，全部都屬於 SQL 格式，每個哋區都有兩個檔案，分別係CustomerAddress 及 Customers。根據 Have I Been Pwned 洩密自助檢查網站創辦人 Troy Hunt…

勒索軟件橫行咗咁多年，以為開始無咩料到？又或者以為一般防毒軟件都夠做，可以防得到？少年，你太年輕喇！網絡安全公司SophosLabs就發現，Ragnar Locker呢隻勒索軟件嘅攻擊模式有「進化」，侵略性又提升咗一個層次。佢哋會喺受害人部電腦入面植入虛擬機器（Virtual machine,VM），然後就用呢個 VM 嘅軀殼嚟逃避防毒軟件嘅偵測，喺一個自製嘅「安全環境」之下繼續進行軟件勒索。網絡安全專家暫時發現，呢隻勒索軟件係靠植入 Windows XP 嘅 VM，然後執行 Oracle VirtualBox，再利用 VirutalBox 程式嘅合法程序嚟做掩護，令防毒軟件無辦法偵測得到。 Ragnar Locker 背後嘅黑客組織過往一向都會喺啟動勒索軟件前，先由目標電腦上偷資料。四月嗰陣，黑客就曾經對葡萄牙能源（Energias de Portugal）公司嘅網路發動過攻擊，當時聲稱偷取咗該公司敏感資料量達 10 TB，亦都勒索咗1580個比特幣（折合約…