無論係「扮工」時間定係等車搭車，我相信香港人無時無刻都係 loop 住 Facebook 同埋Instagram 係咁睇圖，一日掃幾百張都唔出奇。如果話當中有一張半張做過手腳，真係未必咁易發覺得到。 講緊嘅係隱寫術（Steganography），其實佢唔係乜嘢新發明，好多個世紀前已有人用緊，最早由邊個發明就無從稽考喇。隱寫術最適合用嚟傳送機密訊息，例如將訊息內容藏於圖畫或文章之中，由於接收訊息嘅人一早知道解密方法，所以就算將呢啲有餡嘅圖畫或文章公諸於世，其他人一係就睇唔到，就算睇到亦唔會知道密文嘅意思。亦有網站為咗捍衛自己嘅版權，將訊息隱藏喺文字之中，好似之前 Genius.com 懷疑自己製作嘅歌詞俾 Google 偷咗去用，於是喺歌詞內加入隱藏嘅摩斯碼，就咁揭穿 Google 採用嘅第三供應商 LyricFind 真係有搬字過紙嘅嫌疑，所以隱寫術都有正面用途。 隱寫術改圖不易察覺 至於惡意用途，就係黑客可以將要偷走嘅資訊，又或惡意程式代碼收埋喺圖像檔案入面喇。其中一個常見嘅方法係利用 RGB code，我哋平時睇嘅圖，其實背後係由好多個 pixel…