以前中咗勒索軟件（Ransomware），衰到極最多都只係攞唔返啲資料，但自從勒索軟件轉咗新玩法，喺鎖死電腦檔案前會先偷走所有數據，一旦企業企硬唔俾錢，黑客就可以用公開資料嚟加強勒索力度，所以勒索軟件就唔再係攞唔返資料咁簡單，隨時觸犯私隱法之餘，亦會大大力打擊商譽，企業關公真係想兜都兜唔返㗎！ 勒索軟件之所以咁乞人憎，係因為採用嘅加密演算法好難破解，再加上好多時企業都無做好 backup，所以一旦內部檔案被加密，企業本身係無能力還原，應對方法之一係當成個系統被砍掉重練，否則就要乖乖被贖金，期望黑客有「良心」送返條解鎖 key 俾你。瀨得嘢多，唔少企業都學識 backup 嘅重要性，搞到黑客搵少好多，於是黑客自然識得變招，除咗會攻擊埋企業嘅儲存裝置或雲端備份，仲會喺發作前盡量將資料偷走，用嚟加強威脅性，就算唔肯俾解鎖費，都要受害企業俾掩口費刪除外洩資料，否則就會喺黑客自己營運嘅網站上公開機密資料，好多時都包括被害公司嘅財務檔案、客戶及員工私隱資料等等，好似之前我哋報導過嘅 Bossini 事件咁，就有大量商業機密同客戶資料網上見嘞。 正因為黑客轉咗玩法，所以有企業已提升咗勒索軟件攻擊嘅應變態度，唔再選擇收收埋埋，轉而當成資料外洩咁公開，一來有啲公司嘅客戶屬歐盟成員國國民，所以受 GDPR 法規約束要通報；二來由於黑客會事先披露，一定有傳媒查上門，如果企硬否認，只會惹來強烈抨擊，進一步損毁商譽，後果等同搬石頭砸自己隻腳，所以有理由相信會有愈來愈多企業企出嚟承認受到襲擊，香港同業亦應該盡快調整一下緊急應變措施喇。 資料來源：https://bit.ly/38MU7PX 相關文章：【大件事】Bossini、c!ty’super成為勒索軟件攻擊目標？

如果失驚無神有日收到其中一個網站發出電郵叫你重設密碼，作為登記用戶，你第一時間會諗啲乜呢？到底呢封係釣魚電郵，定係網站洩漏咗用戶嘅帳戶資料至要重設呀？ 釣魚電郵係近年黑客最常利用嘅攻擊手段，所以一般人都對呢啲電郵提高警惕，唔會隨便點擊入面嘅連結。雖然網絡專家叫用家只要檢查清楚發信人嘅電郵地址係咪真確，又無暗中擺入假 link，就可以避免俾黑客暗算，但始終大家只係區區一介網民，有得揀都唔會亂 click 啦，何況仲要叫用家㩒掣重設密碼？ 講緊嘅係外國一個專門售賣二手鞋同古著嘅網站 StockX，因為犯咗一個輕微錯誤，搞到喺 Twitter 上俾網站會員瘋狂查詢。事緣最近網站升級，唔知係咪提升咗登入密碼嘅要求定係其他原因，所有登記會員都要重新設定密碼。StockX 為咗提醒用家呢件事，於是就發出電郵啦，但內容只係幾隻字交代網站升級，叫網民㩒掣重設密碼，然後就無其他資訊，試問網民又點會第一時間點擊？梗係要檢查下發出電郵嘅網絡、附帶嘅連結按掣有無古怪先啦。不過就算檢查完發現無錯，今時今日都要再做多次 fact check ，所以有網民就喺瀏覽器輸入官網網址，嘗試唔㩒個掣去睇下乜事，跟住就發現無法登入，一定要改密碼先。 謹慎嘅會員就懷疑到底點解要改密碼呢？係咪網站俾黑客入侵搞到會員資料外洩？所以就走去 Twitter 上 StockX 發生乜事，搞到 StockX 方面突然要回應好多人嘅查詢，澄清並無發生資料外洩，令到原本只係一件通知會員更新密碼嘅小事，升級成為關公事件。…

關公災難近來接二連三爆出，一班公關認真忙，緊急安排完深夜時分嘅記者會解畫都算，完會後又要再度新聞稿為解畫而解畫，心血少啲都應付唔嚟。不過，又唔係所有關公災難都由老闆或高層引起，有時公司其他團隊都無諗過出於好意會便咗踩地雷，認真難搞。 最新出事嘅係美國 Samsung 支援部，早兩日佢哋喺 Twitter 上開 tweet 提醒智能電視嘅用家，內文話唔單只要定期為電腦掃描惡意軟件及病毒，如果 QLED TV 有連接 Wi-Fi，都一樣要每隔幾個禮拜就要用內置嘅安全應用方案去掃描電視先得，同時仲提供埋手動啟用 QLED TV 安全系統嘅視頻。 成件事嚟到呢度都好正路，點知 Twitter 上嘅 followers 突然爆…

呢個世界好難有完美嘅事，就算你砌咗隊好勁嘅班底去搞 app，出嚟嘅製成品都總會有瑕疵。不過，其實大家都接受晒啲 app 有 bug，最重要係開發商反應夠快兼唔好推三推四，先至唔會釀成關公災難！ 講緊嘅係 Uber，呢間今年 IPO 集資最多嘅創科企業，絕對有資格請最好嘅工程師同埋程式員去做好隻 app 啦，但係都唔保證唔會出事，好似 2016 年 Uber 已經衰過一鑊，將幾百萬司機同乘客嘅個人資料外洩，結果要賠成 1.48 億美元先平息到件事，但賠錢事小，商譽受損事大，當時行政總裁 Dara Khosrowshahi 就話會積極補救，去挽回顧客信心。 當然啦，呢啲門面說話係…