大量網絡安全統計數字顯示，醫療機構已成為黑客其中一個至愛目標，除咗因為佢哋保存咗好多病人資料，亦因為醫療機構有大量聯網器材，喺設計時根本無乜點諗過會被黑客攻擊，所以有唔少漏洞可以被利用。 而最新一份由網絡安全公司 FireEye 發表嘅調查報告，就指出由上年十月初至今年三月尾，喺地下討論區內刊登咗大量出售病人私隱嘅廣告，呢啲病歷紀錄主要來自美國、英國、加拿大、澳洲同印度，當中更包含病人嘅電郵地址、駕照、醫療保險資料等等，而最平一宗交易涉及約 20 萬病人資料，價錢只由千六蚊港幣起。考慮到黑客可以攞住呢啲資料，之後用嚟向病人發動社交工程、釣魚攻擊，甚至進行勒索嘅話，呢筆費用絕對係價廉物美。記憶猶新，上年新加坡醫療機構 SingHealth 被黑客盜取嘅 150 萬個病歷中，更包括總理李顯龍，當然如果有呢啲名人資料，價錢就唔會咁平啦。 主動調查黑客攻擊目標 除咗售賣病人私隱外，亦有黑客賣埋醫療機構嘅登入資料，等買家可以自由出入醫療網絡、喺系統植入木馬，甚至橫向發展，感染其他醫療機構嘅系統。而根據 FireEye 嘅報告，嚟自中國嘅 APT 黑客團體，對醫療機構最有興趣嘅係同癌症研究相關嘅研究報告。FireEye 專家話喺今年四月初，多個中國黑客團體嘗試向美國一間醫療中心發動攻擊，偷偷潛入系統去挖掘癌症醫療報告。FireEye 專家指出佢哋喺隔離系統內放置嘅各類誘餌文件中，全部黑客團體都嘗試盜取一份癌症會議文件，專家解釋話相信係中國醫療企業想了解美國治癌嘅最新發展，希望可以搶先喺市場上推出新藥物。 喺報告嘅最後，專家指出醫療體系絕對有必要建立更強及統一嘅網絡安全標準，因為隨著而家愈嚟愈多醫療器材具備上網功能，黑客可以隨意修改一啲醫療設備嘅參數，令病人服用過量或不足的藥物，致病人於死地；亦可以偽造各類檢查報告嘅結果，例如電腦掃描、磁力共振、血液化驗等等，同樣可以令有病變無病，無病變有病添！ 資料來源：https://bit.ly/2L6oG7y

相信大家都收過欺詐電話，要用電話呃人，要花時間與對方溝通，但現今生活節奏急速，很多人都會 cut 你線，要成功得手，絕對唔容易。欺詐電郵就唔同，騙徒首先會對目標人物的背景有所掌握，也會精心製作電郵內容，並以冒充的身份把電郵發出，一般用戶收到這些電郵，都難以判斷真假。 傳統安全方案束手無策 事實上，電郵仍然是現今最大安全攻擊途徑。原因很簡單，發動攻擊成本不大，因為你是不能拒絕攻擊者發送電郵給你。況且傳統的電郵安全方案也好一段時間沒有技術革新，依然側重於防病毒、防垃圾電郵等功能，把懷疑有問題的 Email 隔離就了當。面對更新型的欺詐電郵攻擊，傳統的電郵安全方案缺乏技術及能力處理，可以說是有點手束手無策。 BEC 個案平均損失近百萬港元 Business Email Compromise（BEC）是近年出現的名詞，指利用欺詐電郵手法（或附有網絡釣魚攻擊）的新型威脅。 BEC攻擊者大多數會冒充公司外國供應商、老闆、公司高層、公司員工、公司律師（會計師）等… 欺詐目標大多數是公司的財務或高級管理人員，最終目的是以不同的藉口要求匯款，令公司蒙受重大金錢損失。據統計，每個案平均損失近百萬港元，這絕對是大茶飯。 期待最新技術杜絕 BEC BEC 之所以難以防止，因為它利用大眾的疏於防範的心理，讓受害者掉入社交工程（Social Engineering）陷阱。在今天高度透明的商業社會，要找出財務部門（或公司高層）的電郵地址並非難事，這也意味著一個一個精心炮製的欺詐，隨時可以用電郵發動。在「道高一尺魔高一丈」的網絡安全環境中，我們總不能單單每日叫員工提高安全意識。新一代的電郵安全系統，終於包含了BEC 防護功能，期待最新技術能把這類超級大殺傷力的欺詐電郵威脅徹底清除。