曾幾何時，OnePlus 手機喺香港都有唔少人玩，貪佢性價比高，Android 系統接近原生，運作速度同流暢度都夠高。不過，後來新機價錢愈賣愈貴，而且亦俾人舉報系統有後門，搞到好多人即時卻步。最近 OnePlus 又再出事，有用家收到佢哋寄嚟嘅電郵，話公司發現內部系統有匿名登入，而且仲接觸過客戶嘅資料添，收到信就代表係受影響人士，作為用家或曾經係用家嘅你，又收唔收到通知呢？記得檢查埋垃圾郵件信箱呀！ 就喺上星期，有 OnePlus 用家收到官方發出嘅電郵，表示佢哋最近偵測到有匿名人士闖入佢哋嘅內部系統，而且仲嘗試讀取用家嘅購買紀錄資料。不過，OnePlus 方面已第一時間話俾受影響嘅用家知，洩露嘅資料包括姓名、聯絡電話、電郵同郵寄地址，其他好似信用卡、登入密碼就安全。OnePlus 方面雖然無清楚講明匿名人士利用乜嘢方法進入內部系統，但就話已經堵塞咗呢個漏洞，同時亦檢查埋系統仲有無相同漏洞存在，保證會持續提高網絡安全強度。 單係咁講，真係可以挽回用家信心咩？尤其係年初先俾人入侵網上購買平台喎，答案當然唔得啦，所以 OnePlus 亦公布喺嚟緊 12 月，將會委托一個知名嘅網絡安全平台，推出賞金獵人計劃，邀請全球黑客去發掘 OnePlus 嘅漏洞，去提升品牌嘅安全性。雖然暫時未知會同邊個平台合作，但相信都可以令粉絲比較安全嘅，至於其他未用過又想試用嘅客戶，最後會唔會都係「不了」呢？講到尾，都係抵下部機夠唔夠抵買啫，好多人都好善忘嘅！ 資料來源：https://bit.ly/2KTSfKl

DEFCON 網絡安全大會，每年都吸引到好多業內高手或黑客出席；所以如果你所屬組織長期需要呢一方面嘅專家，呢類型嘅黑客大會就係最佳揀蟀機會。好似喺今次大會，就連美國國防部人員都到場，目的就係說服有識之士為國家效力！ 五角大樓長期缺人 今次 DEFCON 其中一個亮點，就係將成間醫院嘅設備搬咗入 BioHacking Village 俾大家試 hack。但同一時間，喺今屆首設嘅 Aviation Village 入面，亦放咗部 F-35 戰機駕駛模擬器喺度俾入場人士了解下。喺啲咁嘅場合，美國國防部有人喺度絕對合理，但呢個剛啱喺今年 4 月上任嘅 Defense Digital Service（DDS）https://dds.mil/…