「N號房」事件相信大家聽過，呢單喺韓國轟動一時嘅性犯罪案件，背後嘅犯罪集團正正係透過通訊軟件Telegram以加密方式營運，令好多人關注通訊軟件會唔會變罪犯溫床。最近英國國家刑事局（NCA）就聯同埋歐洲國家執法機構，破解咗不法之徒利用一種叫「EncroChat」嘅秘密通訊軟件，成為英國歷黎最大規模同最尖端嘅執法行動。 喺今次行動入面，單單英國國家刑事局人員就拘捕咗746人，起出咗5400萬英鎊（多過5.1億港元）贓款、77件武器、超過2噸毒品，成功搗破不法份子用嚟販毒同走私軍火嘅高度機密通訊網絡。喺被搜出嘅武器之中，包括半自動機槍、手槍、4嚿手榴彈、1支 AK47 步槍同埋超過1800發子彈，同時充公咗55架名車同73隻名貴手錶，可想而知，涉及嘅案件規模有幾大型。 根據消息，被捕者之中更加包括一啲犯罪組織大佬，如果屬實，今次真係直搗黃龍。除咗喺英國落網嘅個700幾人之外，其餘涉案者喺歐洲其他地區被捕，一共拉咗超過800人，法國、荷蘭警方同歐洲刑警都有份參與，成個調查行動用咗超過三個月。 「EncroChat」呢隻App係源自法國，可以喺Android 手機下載同安裝，估計全球有6萬個用家，喺英國就大概有1萬人用緊，但係而家已經下咗架兼停用。英國國家刑事局形容隻App已經淪為罪犯嘅「犯罪市場」，佢吔會專門利用呢個加密平台黎聯絡溝通，籌劃各種非法勾當，例如販賣違禁品、洗黑錢、買兇殺人等罪行。 根據「EncroChat」嘅網站介紹，用家除咗可以加密通訊之外，仲可以自已set 指定時間，令收發訊息自動毀滅。除咗提供加密通訊軟件之外，「EncroChat」仲會賣加密手機，每部賣900英鎊（即係大約8600港元），而且要另外俾使用費，六個月費用就係1350英鎊（即係大約1.2萬港元），咩人先會用到呢啲電話？你懂的。 資料來源：https://zd.net/31X6Aii 相關文章：【Telegram都出事？】北韓黑客偷加密貨幣開發核武

除咗銀行，賭場都稱得上係另一個收埋好多錢嘅地方，如果話你知有黑客成功入侵賭場，第一個反應通常都以為係為咗偷錢。不過，竟然有黑客係為咗偷賭客資料而入侵，唔通嫌錢腥？ 根據網絡安全公司 Talent-Jump 及 Trend Micro 剛啱公布嘅調查報告，指出由上年夏季開始，已發現有一班由中國政府支援嘅黑客組織，開始向一啲網上賭博或投注網站發動攻擊，佢哋嘅目標主要係針對東南亞賭博公司；而入侵目標係瞄準資料庫及程式源碼。專家指出，呢班黑客入侵嘅手法並唔特別，只係透過魚叉式釣魚電郵（spear-phishing），引誘賭場員工開啟電郵內嘅附件，喺網站上植入後門，之後就陸續安裝各種惡意軟件，包括暴力破解工具、掃瞄 NETBIOS 伺服器工具、提升權限工具、盜取密碼或 Clipboard 資料工具等等，令佢哋可以喺內部網絡搵到想要嘅嘢。由於呢班黑客係利用 Dropbox 嚟儲存惡意軟件及 C&C 工具，所以安全專家將佢哋稱之為 DRBControl（DRopBox Control）。 以往國家支援嘅黑客組織，主要係為咗政府服務，例如有專門針對竊取高端技術嘅黑客，亦有以癱瘓目標網絡活動嘅黑客軍團，不過，專家指出今次入侵賭博網站嘅行為似乎同國家無關，好可能只係黑客嘅個人行為。事實上，網絡安全公司 FireEye 喺上年亦指出有中國支援嘅黑客組織喺工餘時間，為興趣或個人利益去發動私人攻擊。至於入侵賭博網站係咪真係同政府無關呢？我個人就有好多聯想嘞，例如係咪搜集緊某啲「賭客」嘅投注記錄，作為洗黑錢或收受利益嘅證據？無論係為國家或個人利益，攞住呢啲痛腳，回報同風險隨時好過直接偷錢多多聲㗎。…

做得黑客，好多時候都係為錢，整咗個勁嘢，當然唔會收埋自己用咁簡單，最好就係公諸同好，放上網公開發售，乘機收返少少開發成本，呢個市場長做長有，質素高功效好嘅病毒程式，仲長期大賣添！ 寫得好，仲會吸引到國家級黑客！最近資安機構 SentinelOne 就出咗份報告，話發現北韓國營黑客集團 Lazarus Group，居然走去買 TrickBot 返去用。 嗱，其實我係無貶意嘅，TrickBot 話晒都係全球三大 botnets 病毒程式之一，實力有返咁上下，只係斷估唔到北韓會吼中佢，事關以佢哋嘅實力，實在唔需要外求，自家研發能力都有返咁上下，點解要買個現成程式返嚟呢？ 報告就話件事唔係咁簡單，一來用 TrickBot 入侵，冇咁易估到係國家級黑客做，最多當係商業行為，容易掩人耳目，二來喺 TrickBot 下面可以加好多組件，今次北韓班黑客就加咗 Anchor，呢個組件出名用嚟搞銷售系統，而今年年初美國財務部就話發現至少有三個北韓黑客組織，入侵銀行系統嚟抬錢返國家，資助國家添置武器，唔排除今次 Lazarus Group 有同樣目的。 其實今次唔係單一事件，今年美國已經發現 GameOver Zeus 同埋 Dridex 呢兩個病毒程式，同俄羅斯國家黑客有連繫，呢個趨勢發展落去，私營同埋國營黑客條界線只會愈嚟愈模糊，日後兩者一齊夾份做世界都唔奇，歐美國家真係有排煩！ 資料來源：https://zd.net/2RWGyXs