IT業界社群及資訊平台

【專家主場】形外佳興 ─ Quantum 黐纏

Quantum Entanglement 中文叫「量子纏結」,聽落有如愛情小說一般黐纏。量子即是能量包,原本能量不是一包包的,正如未有糯米雞之前,rice 是 uncountable 的。但在上世紀,科學發現,事情要兩面睇(這句話可否申請一個「物理文學獎」?),光也有粒子性,而且,兩枚光粒子,會纏結在一起。講乜呢?即係兩粒光子,不可視之為兩粒,而是二為一體,一幣的兩面,如果A果面係0,B果面就係1。最奇特嘅就係,呢兩粒光子,就算在銀河的兩端(不遠,十萬光年),在纏結解開的一刻(whatever this may mean),都可以保證,如果A呢面係1,對面就係0;如果A呢面係0,對面就係1,這叫做「超距作用」(聽落好似武功…轟轟轟,超距作用,死啦!)。近日發現,兩粒纏結的光子,除了穿越空間,也可穿越時間,即係話,幾分鐘前嘅一粒光子(可能已經不在人世),也可以與未來的一粒光子纏結,離奇到爆。Bishop Berkeley 說:存在說是被感知。在量子纏結這現象中,真係咁樣,1010的表現,在感知的一剎那。而且,Bishop Berkeley 會唔高興嘅一點,就係上帝都偷聽唔到,因為,兩粒黐纏光子,一旦其中一粒開估,纏結就被破壞,對家就知道有人偷聽,嘻嘻。

有冇聽過 Symmetric Encryption? 在IT保密學中,兩端要夾一條秘密通信,要加密,對不對?如果要加密,兩頭要協定一條 Key,如果唔係,收到你信息,一堆XYZ,我點樣解密?問題係,我同你之前點樣夾呢條 Key?所以呢,以前的閏女,要交一條信物給郎君,日後信息傳來,附上此信物,保證信息 Authentic。不過只用一次,近乎 One-time Password。閏女把信物,親手交給郎君,就是 Key Distribution。Key Distribution 很不容易,因為在 Internet 交易中,講真,一定唔想見面,通信兩頭,如何在千里之外夾條 Key 呢?簡單講,有人代閏女傳來了一條絲巾,我又點知係佢?會不會有 Man-in-the-middle Attack?所以果粒墨子號衞星,在太空把兩粒纏結光子,向兩頭射,兩家收到,不用見面,不用中間人,卻可保證,你我的1010一致,咁就以此為Encryption Key,繼續通信。勁。

Neo 按:

近幾百年,所謂教育,越來越知識化。百年樹人、立人志向之教育,化為海獅訓練班,課程有咁複雜得咁複雜,言必數字化,行必KPI。遙想佛陀當年,教化弘立了,眾僧肅穆。手拈一花,微笑間,妙法一瞬得傳。摩訶迦葉尊者與佛心之間想必有一對量子纏結云