【IT專才移民】英國 IT職位市況實測
好多人最近諗緊移民大不列顛，首先要考慮嘅就係搵食問題。始終如果無工做，又點可以喺英國生存呢？與其自己估估吓，我哋不如真係做吓 research，以IT及cyber security兩個Keywords，實測英國三個最受歡迎嘅求職網站，睇吓空缺情況先哩。
我哋測試嘅日期係 2020 年 7 月 4 日，用「IT」及「cyber security」兩個Keywords 搜索。大家要留意嘅一點，就係輸入地點好緊要，切記揀啱地方以及設定方圓幾多距離，出嚟嘅效果先有參考性。而我哋以最大路嘅地區設定：倫敦及大倫敦。結果如下：
indeed：IT－1491 jobs・cyber security－730 jobs
大家應該都好熟悉 indeed，UK 版本同香港差唔多。indeed 係比較大路嘅搵工平台，有唔同 level 嘅工作。結果顯示「IT」工有千幾份，幾好景，當中都有幾筍嘅工，例如有份 IT Infrastructure / Operations Lead，年薪有50,000 至 60,000英鎊，可以遙距工作；亦有比較初級嘅如Entry-level Information Technology Consultant，都有23,500 至 26,500英鎊，即月薪都有兩萬港紙。
搵「cyber security」工呢？單單倫敦區就有730份，有唔少請 Analyst，如 Cyber Response Consultant（entry-level）年薪有30,000 至 40,000英鎊；另一個發現，係有唔少政府、大學等機構請人，呢類工可能會比較穩定。
（圖：indeed）
Glassdoor：IT－475 jobs・cyber security－124 jobs
想知行情市價，可以多留意Glassdoor，唔少用家會 share 見工情況、市況等情報，但略嫌多廣告。我哋輸入「IT」，結果有 475 個職位空缺，由 IT Technician 到 Manager、Director 都有。IT Technician 年薪21,210英鎊，IT Manager 年薪50,000 至 55,000英鎊，IT Director年薪可達90,000 至 100,000英鎊，即年薪百萬，仲有 excellent benefits。
網絡安全工作方面，就有124份。當中一份 Cyber Security Engineer 工作，年薪有65,000 至 75,000 英鎊加 Benefits Package；亦有唔少C++工作，一份Software Developer – C++ – Cyber Security 工作，年薪40,000 至 70,000英鎊。
（圖：Glassdoor）
Job Centre Plus：IT－1873 jobs・cyber security－27 jobs
英國政府官方求職平台，有全職、兼職，記錄嘅 IT 工種數量多，而且經官方出，比較信得過。官方求職平台嘅好處，就係政府工比較集中，各大學、NHS（國民保健系統）嘅工都可以搵到。當中不乏吸引工作，如 IT Manager 年薪60,000 至 80,000英鎊、IT Network Manager 年薪40,000 至 45,000英鎊、IT Support Analyst 年薪 20,000 至 25,000英鎊。
但係網絡安全工作方面，如果輸入cyber security，只有27個搜尋結果。當中唔少工都冇顯示薪金，不過，都有幾份幾吸引嘅，如 ICT Cyber Security Lead，年薪63,805 至 70,823英鎊。值得一提嘅係，英國 NHS 因疫情影響，除咗醫護，其他崗位都缺人，包括唔少 IT 職位。
（圖：Job Centre Plus）
另外，大家亦要注意英國嘅稅收，係比香港高唔少；年薪低於 12,500 英鎊獲豁免稅項；然後12,501 至 50,000英鎊就抽20％；年薪50,001 至 150,00英鎊就升到40％；再上就抽45%。其實要响英國搵IT工作都並唔算困難，而且高中低職位都缺人，大家不妨留意一下。
