IT業界社群及資訊平台

【技術革命】 那年夏天,我手執「周慧敏閃中閃」,但唔開心。

那一年,Yes!Card 大行其道,我有一張傳說中嘅「周慧敏閃中閃」,雖然那種「幸運是我」嘅亢奮,上堂瞓著都笑醒,不過,隨之而來,竟然係滿肚鬱結 ─ 那個年代冇辦法證明到手中 Vivian 嘅真偽,好唔 secure。於是,先口角再動武,friend 都冇得做,成件事令我一直耿耿於懷。

所以,我對區塊鏈遊戲充滿期盼,希望可以撫平我嘅情意結。

「從現在開始我們就係一分鐘嘅朋友,呢個係事實,你追唔返…」

旭仔同蘇麗珍如是說,一直以來,人類對「獨一無二」、「永恆」充滿情意結,愛情如是,遊戲世界亦然。打從足球卡、龍珠卡、Yes!Card 到電子世界養隻 Tamagotchi,我地珍而重之。而區塊鏈嘅魅力,就係為每一個交易紀錄「封印」,理論上,冇人可以改變到,史無前例地實在,係獨一無二,係浪漫到核爆。

當年為養隻 Tamagotchi 瘋狂,我地對「獨一無二」珍而重之
當年為養隻 Tamagotchi 瘋狂,我地對「獨一無二」珍而重之
CryptoKitties 橫空降世

去年十月,區塊鏈遊戲 CryptoKitties 測試版推出,遊戲其實好低 B,係一張圖片咋。不過每隻貓咪都有獨立造型,你可以配種、買賣,用 ETH(以太幣)交易,每個步驟均以區塊鏈技術紀錄,每隻貓咪都「獨一無二」。好快 CryptoKitties 成為城中熱話,十二月二日,創出 246.9255 ETH(約 11 萬 7 千美元)一隻貓咪天價。然後,區塊鏈遊戲成為雨後春筍。

CryptoKitties 創出 11 萬 7 千美元交易天價
CryptoKitties 創出 11 萬 7 千美元交易天價
全港首個區塊鏈遊戲 Ether Dungeon

Ether Dungeon 於三月初上架,遊戲結集英雄、怪物元素,玩家可以育成、買賣英雄。遊戲利用以太幣進行交易,玩法與一般區塊鏈遊戲類似,英雄造型靚仔。最重要,係由香港人創作,開發遊戲,仲要係區塊鏈遊戲,技術、市場一切未知,勇氣可嘉,實在令人鼓舞。

玩家可於 Ether Dungeon 內育成、買賣英雄
玩家可於 Ether Dungeon 內育成、買賣英雄
專訪開發團隊 AppX

香港難得有人願意開發,我地一定要支持。而開發團隊 AppX 嘅 Matthew,主力工作就係寫 Apps。「團隊本身都喜歡打機,英雄、怪物遊戲之類,亦一直都有留意區塊鏈技術,就嘗試自己創造一款。」區塊鏈遊戲嘅魅力,當然係「唯一」。「區塊鏈遊戲真係好新,其實玩家唔係好多。魅力之一係玩家可以『擁有』個英雄或者角色、保障冇人可以 hack 到、同時有機會賺錢。」

Matthew Cheng 帶領開發全港首個區塊鏈遊戲
Matthew Cheng 帶領開發全港首個區塊鏈遊戲
區塊鏈技術或似 internet 第一次面世

不過,一切都仲係起步,Matthew 都在摸索。「區塊鏈嘅運作就係一個個交易紀錄,唔可以好似打機咁多快咁多動作。所以區塊鏈遊戲暫時要非常簡單,一般都係 upgrade、買賣。大家都仲摸索緊,我覺得可能好似 internet 第一次面世,當時好少人知道、接觸到,更加唔知後來會變成點。」外國已經有大量遊戲開發商不斷研究運用區塊鏈技術,遊戲玩法、貨金、交易生態必定改變,革命性發展係遲早嘅事。區塊鏈技術亦唔只係掘金商機,响日常生活各方面都可以帶來改變。包括幫助我地响無限複製、盜取、欺詐嘅陰霾之下,帶來曙光,解開擁有眾生「獨一無二」嘅情意結。