每個人的指紋都係獨一無二，所以常被用作識別個人身份，提供犯罪證據。同人嘅指紋一樣，原來瀏覽器都有自己嘅專屬「指紋」，而且同樣可以被用黎識別、鎖定、追蹤用戶身份，咁個人隱私咪好大鑊？
瀏覽器指紋（Browser Fingerprint）又叫數位指紋，係指用戶使用瀏覽器上網時，被遠端網站收集的資訊。指紋可以包括：瀏覽器類型和版本、操作系統、螢幕大小、螢幕解像度、時區、語言、字體、User Agent、JavaScript、Flash 和 Java Extension、Canvas 等等。
當中一至兩個資訊可能唔夠用作識別身份，不過一旦 combine 佢地，第三方就能夠精準鎖定瀏覽器用戶。指紋有三個特性：
一係準確性，極低嘅相似率，可以從千台設備中識別出某個特定設備；
二係易獲取性，用戶喺瀏覽網頁時，Web 伺服器可以好輕易地獲取指紋，而且隨著 browser 引入更多 API，獲取指紋會變得更加容易；
三係穩定性， 無論用戶第幾次瀏覽網頁，佢所產生嘅指紋都會一樣。
小編亦親自測試瀏覽器指紋（測試網站見最後），結果如下：
原來小編嘅瀏覽器指紋全世界只得一個！換咗幾個唔同 browser 再測，都得到同樣答案，而且相關的指紋數據一覽無遺。即係話，廣告商可以輕易獲取用戶的瀏覽器指紋，並根據指紋快速鎖定目標，分析上網習慣，制訂個人化廣告，仲可以持續追蹤。
其實瀏覽器指紋對用戶隱私的威脅真係好大，就算你用 Chrome 嘅 Incognito Mode（無痕模式），指紋數據都照樣可以被收集。好在現今好多瀏覽器廠商都大力發展反瀏覽器指紋追蹤技術，例如 Apple 就喺今年發佈 macOS Mojave 時，介紹新版 Safari 透過簡化設備黎加大防瀏覽器指紋追蹤的難度。網上亦有唔少 extension 可以偽裝 User Agent，例如 Secretagent、User-Agent Switcher 等。大家亦可以自行更改瀏覽器設定，禁用 WebRTC、JavaScript 等等。提防瀏覽器指紋追蹤，大家千祈要小心啦。
相關文章：【Browser FingerPrint 測試網站】
資料來源：