IT業界資訊媒體

【釣魚收藏家】三萬美元 買齊1300款釣魚工具

最新消息,暗網上有釣魚工具套件收藏家,一次過將成批釣魚工具拎出嚟賣,計落平均 25 美元就有一款,入面有齊晒偷 Amazon、OneDrive、Apple、Fackbook、Gmail 以及多間銀行等帳戶登入資料嘅專門工具,無論你係 hacker 又好,網絡安全研究員都好,呢個 collections 應該都幾吸引。

呢個總容量高達 3.3GB 嘅釣魚套件 collections,老實講並唔係全部都由販售嘅黑客自己寫出嚟,根據同黑客接觸過嘅 Bank Security 網絡安全專家所講,當中有 9 成係利用惡意程式碼搜尋工具搵出嚟。專家話有咗呢個 collections,已可以向排名頭 500 位網站嘅使用者發動攻擊,套取對方輸入登入帳戶資料,真係非常方便,潛在價值亦相當高。

雖然販售嘅黑客話呢啲工具可以喺網上搵到或買到,但如果全部都要自己搵都幾麻煩,再加上如果有留意早前我哋關於釣魚工具嘅市價價格調查報導,可能都會記得最平嘅都賣緊 20 美元,最貴仲賣到 880 美元,所以用平均 25 美元嚟買都算幾實惠。不過,亦由於已經喺市場運作緊,所以買家都有啲風險要冒,就係部分釣魚工具已經被防毒軟件記錄在案,根本過唔到過濾器果關。

好嘞,如果真係有興趣想買又點呢?用開淘寶、樂天呢類網購平台,都知道要帶眼識人,睇吓賣家嘅評價或評語先好出手啦,而專家話呢個賣家都幾低調,係呢個暗網討論區做咗三年會員都只係得三個評語,而三個都係正評,至於有無參考價值?計我話就麻麻囉。

資料來源: https://bit.ly/3iVdhHP

相關文章:【海鮮價】網絡釣魚套件逆市升149%

https://wepro180.com/tech-news/【海鮮價】網絡釣魚套件逆市升149/

Privacy Preference Center