IT業界社群及資訊平台

【有事要出聲】五大徵狀 悉破勒索軟件入侵

勒索軟件頻頻作惡,再加上而家呢類惡意攻擊已經唔會淨係鎖死你嘅檔案,仲會偷埋你嘅機密檔案進行二次勒索,唔俾錢就公開,所以真係好需要盡早釋破入侵行為。之不過,勒索軟件而家變得咁隱密,可以點防範呢?專家教路,只要留意以下一啲電腦系統嘅運作細節,就可以減少損失㗎喇!

檔案彈出彈入:如果突然發現,電腦或公司內部網絡成日唔見咗啲檔案,又或突然出現一啲陌生嘅檔案,都係已被勒索軟件入侵嘅警號。

龜速運作:由於勒索軟件會暗中偷走重要資料,所以好可能喺背後密密運作,如果發覺系統行得好慢,又或每次開機都慢過人,就要留意喇。

經常炒 app:中招另一個徵狀係,系統或某啲 application 經常無緣無故炒機,好可能係當中某啲檔案正被勒索軟件加密,既然讀唔到,炒機都合理丫。

防毒退場:要不知不覺做嘢,防毒軟件自然係勒索軟件嘅天敵,所以只要勒索軟件成功入侵,就會設法修改防毒軟件,令佢哋無法運作或開機時啟動唔到,方便做嘢丫嘛。

古怪電郵:如果有人同你反映,成日收到由你發出嘅古怪電郵,亦都係一個重大啟示,因為勒索軟件除咗攻擊你,仲會嘗試擴大攻擊層面,落手對象自然係喺你嘅 contact list 入面搵啦。

如果你發現平時用電腦有以上徵狀,記得要第一時間通知IT部門,因為勒索軟件會喺公司網絡內極速擴散,你一個人嘅發現,隨時可以救返成間公司㗎!

資料來源:https://bit.ly/3jHCHJg

唔想錯過熱門網絡保安消息,請即訂閱 wepro180 電子周報:https://bit.ly/2ZcCi9J