IT業界資訊媒體

【心急人上】個人資料遭外洩,「身份監察服務」有冇用?

今年大型個人資料外洩事故特別多,事故發生之後,出事機構可以做咩?就係報案>公布壞消息>公開道歉>發電郵畀客戶道歉。大家都好擔自己資料賣咗去邊,又想知有冇被盜用,為咗安撫客戶,有機構會送個「身份監察服務」以作補償,究竟有冇用架?

答案係冇用

網站 How-To-Geek 發表咗一篇文章講呢個問題。隨著個人資料不斷被外洩,坊間湧現出不少「身份監察服務」(Credit monitoring services),例如 LifeLockIdentity Guard,國泰同萬豪就用 Experian,一般都有個收費計劃,平平地每個月收你十幾至幾十美金,主要「服務」就係幫你睇下資料有冇被盜用或發售。沒錯,只係幫你「睇」,身份監察服務並冇辦法阻止或防止資料被盜用嘅。呢種服務嘅作用,幾乎係純粹「安撫」。

好啦,如果我加錢升級上 premium 又會否好啲呢?都唔會。

不少身份監察服務會推介你升級,又話會去 Dark Web Scan 又話高科技監察你部腦云云篇文章就好唔客氣咁批評,話係冇意思嘅。首先都係嗰句,你嘅資已經被外洩;第二,好似防毒軟件咁幫你「監察」部腦都係冇意思嘅,因為黑客嘅目標係大企業資料庫,鬼得閒搞你部腦咩!升級只會買來更假嘅安心,係更嘥錢嘅。

咁我可以做乜嘢先?

建議一:唔好登記「免費試用」身份監察服務

首先,人地開門做生意,邊有免費咁著數?不少服務過咗試用期之後,就會同你自動過數 renew plan。另外,再講多次,你嘅資已經被外洩咗,㗎喇。到頭來,你又要去取消個帳戶,有取消 cable 經驗嘅,就一定唔會試。

建議二:自己資料自己監察

假如真係好想知自己嘅資料去咗邊,坊間真係免費網站喎,文章內推介 Credit Karma FreeCreditScore.com,登記之後可以查看名下嘅信用卡資料情況,其實已經好夠,用唔用就自己諗諗。

建議三:乾脆凍結咗張卡

假如真係好唔安樂,咁建議你乾脆凍結咗張卡,一了百了,呢個亦係最有效直接嘅方法。

建議四:人肉防火牆

本地資訊科技名人方保僑先生極力推介嘅「人肉防火牆」,概念好簡單,萬事小心,乜人都信唔過,自己資料自己監察,做好密碼、個人資料管理,遇有任何可疑舉動,尤其錢銀交易,例必細心核實,咁就最穩陣。

在此真心提醒大家,意外嘅嘢,大家都唔想。但唔好再將負責推去 IT 部門,亦唔好旨意各大中小企業一定安全。網絡安全係大家嘅事,自己要小心,多留意新聞資訊,例如緊貼 wepro180,以及分享有用資訊。

資料來源:http://bit.ly/2rNdPWN