IT業界資訊媒體

【威還威,帶頭盔】5 種絕不能出的post

古語有云:行動前想一想,說話前想多想,出 post 前想三想。

活動門票

有得睇演唱會、英超歐聯係好威,好想放閃炫耀,不過,世上有好多活動門票並唔係實名制,更有好多活動門票其實只係認個 Bar Code。所以當你好開心咁 post 張門票出來之際,分分鐘有人攞咗去複製一張入場先,咁就 post 門票變送門票喇。

登機證

出外旅遊當然要放閃曬命威威,好多人喜歡入閘前出 postshow show 手中的登機證。不過,一張看似簡單的登機證,原來可以曝露好多資料。有心知道你嘅姓名及航班,分分鐘可以得到你嘅其他資料如飛行計劃編號,甚至可以登入閣下嘅帳號更改你嘅座位、航班等。最重要嘅,係黑客可以掌握你嘅行蹤,然後設計行騙,例如致電你家人話你於海外出事要急錢。

子女生活細節

有資料顯示,單單在英國,父母在社交媒體就上載咗超過 13 億張孩子的照片,當中接近三份之一是公開,即可讓陌生人隨意觀看這些照片。在香港,尤其是生日會、開學日、畢業禮之類「大事」,父母都喜歡 post 照片呃 like,但此舉其實非常危險。黑客可透過照片獲得大量信息,例如孩子名稱、學校、地點、班別甚至是出生日期,藉此進行不法的行為,包括拐帶、誘騙,此外,天下間其實有不少戀童癖喜歡收集兒童私照,家長出 post 前務必仔細諗清楚。

辦公桌

不少人喜歡宣示自己的日理萬機、OT 未收工或者工作日常,睇落似乎好平常,不過,post 之前請檢查一下有冇可能唔覺意地漏露公司機密,例如寫咗密碼嘅 memo、某某聯絡號碼、甚至是收據、報價單等,不少「有心人」或者商業對手可以獲得非常重要的資訊。

稅單及文件

每年的交稅季節,大家就會影張稅單照片訴告,此舉當然極之不智。其實任何單據、告票、傳票、證明書上都有非常重要嘅個人資料,萬一被黑客獲取,就可以進行大量不法行為。可少受害人被冒充伸請信用卡、借貸甚至墜入詐騙陷阱。此外,某些政府文件及傳票其實嚴禁公開的,出 post 者分分鐘犯法,可能要負上法律責任,小心。

奉勸大家:威還威,帶頭盔

社交媒體已成生活一部份,與大家分享生活點滴也無可厚非。但如果將零碎嘅點滴拼湊,找出其相關性(correlation),就可能砌出一由大圖畫,大量個人資料赤裸裸公開,後果可以非常嚴重。所以大家出 post 前務必先冷靜,諗清楚後果,檢視一下照片或者資訊會否過多。