IT業界社群及資訊平台

【吹水打機隨時中招﹗】Discord,Geforce Experience 發現嚴重漏洞

打機係唔少人嘅興趣,趁住近年日益增長嘅電競趨勢,唔少人屋企都買返部打到機嘅電腦。要打機,一張好嘅顯示卡或不可缺。但係,顯卡市場上其中一個大商家——NVIDIA 旗下軟件,GeForce Experience 今次就被發現嚴重嘅安全漏洞,可以令 Windows 同 Linux 嘅電腦面臨資料盜竊,亦可能受到 Denial-of-service 攻擊。GeForce Experience 功能包括自動優化遊戲運作﹑下載驅動程式同錄影,對玩家同直播主有好大嘅幫助。早喺2017年,世界上使用 NVIDIA 顯卡嘅電腦已經超過兩億部,而今日只會有更多。而用NVIDIA產品嘅電腦好多時已經直接裝有 GeForce Experience,加上極大量嘅用戶,今次漏洞影響人數多到數唔曬。

打機當然成班人一齊先好玩架啦,但係網吧又貴又焗,加上疫情影響,大家都唔會坐埋一齊打機。呢個時候當然要出動語音聊天軟件——Discord 自稱為玩家度身訂造嘅語音軟件,支持極大量嘅用家同時在線,仲可以直播同建立自己嘅 server。不過,千其唔好放低戒心——你永遠唔知同你講緊嘢嗰個係「豬隊友」定「神黑客」﹗ Discord 雖然基本上免費,但係同時都有推出月費增加直播質素﹑自訂emoji之類嘅plan——Discord Nitro。由於Discord嘅code非常容易被修改,近來出現大量聲稱可以幫人免費獲得 Discord Nitro 嘅人喺大大小小嘅server入面出沒。一但下載被修改過嘅Discord 應用程式,就等如將自己部電腦交咗畀黑客﹗木馬程式同 Discord 本身官方嘅程式極度相似,仲極難發現,一個唔小心,比人偷曬D信用卡都唔知﹗

雖然漏洞影響唔少人,但係拯救自己嘅方法其實好簡單架咋﹗只要定時下載官方發佈嘅更新,唔好懶嗰小小就冇事喇。

資料來源:https://bit.ly/2OK6KSk

唔想錯過熱門網絡保安消息,請即訂閱 wepro180 電子周報:https://bit.ly/2ZcCi9J

 

Privacy Preference Center