IT業界社群及資訊平台

【以色列 Unit 8200】全宇宙最勁網絡專家喺呢度

上月尾打開報紙見到單新聞,話澳洲政府多謝以色列政府,幫手救番佢哋航班上百幾個乘客條命!睇真啲,原來係以色列收到情報,話會有四個來自「伊斯蘭國」嘅恐怖份子,將炸彈藏入絞肉機,諗住帶上飛機「一鑊熟」,如果唔係以色列提供情報,睇怕都……不過成單新聞最吸引我嘅地方,係提供情報嘅係以色列一個名為 Unit 8200 嘅軍方機構,呢間嘢相當猛料,今日就同大家介紹下。

話說以色列係個要強制服兵役嘅國家,後生仔但凡夠 18 歲都要當兵,大部份會隨機分配到唔同單位,但係當中就會抽走一批天資聰穎而又醒目叻仔嘅,去 Unit 8200 報到。咪以為好易入選,佢係從全國最優秀嘅1%年輕人中再選最頂尖嘅1%,要數學、電腦、語言都考到好高分先得,分分鐘難過入牛津同哈佛,所以入得去嘅都必定係尖子!

入選 Unit 8200 分分鐘難過入牛津同哈佛

選咁多尖子入去做乜?其實好簡單,就係做網絡保安同埋情報收集!最初隊名叫「第二信息服務部」,後來改名做 Unit 848,1973 年中東戰爭後正式改名做 Unit 8200。個名點改唔重要,睇佢「戰績」最緊要,Unit 8200 基本上參與晒以色列所有軍事行動,近年比較出名,就要數 2007 年利用網絡戰,癱瘓敘利亞防空系統,令以軍戰機成功轟炸炸敘利亞起緊嘅核設施;2010 年佢哋又成功利用蠕蟲病毒,破壞伊朗鈾濃縮設施。

Unit 8200 戰績彪炳,基本上參與晒以色列所有軍事行動

好多人會好奇,點解 Unit 8200 好似乜都做得到,有曾經入過去 Unit 8200 服役嘅士兵話,部隊嘅超級電腦勁到爆,可以從截取到嘅電話同埋 email 入面,自動識別出敏感字眼,不過點叻都係機器,始終隊員係精英中嘅精英,士兵憶述話試過上司叫佢諗辦法入侵敵國安全網絡,但就冇具體方案,如果唔係隊員夠 smart,呢啲 mission impossible 都幾難完成到!

「網絡保安之父」Shlomo Kramer 正是前 Unit 8200 成員

入過 Unit 8200 呢間少林寺,退役後當然唔會返寫字樓做個文員仔啦,《福布斯》就統計過,由前 Unit 8200 成員創立嘅科技公司超過 1,000 間,包括你同我耳熟能詳嘅 ICQ、Viper、Wix、Check Point 等等,涉及雲端計算、大數據、網絡保安等多個領域,「網絡保安之父」Shlomo Kramer 正是前 Unit 8200 成員。將軍用技術應用到唔同範疇造福世人,以色列之所以可以變身科技大國,原來係有原因嘅。