【wepro小教室】社交工程

社交工程 （Social Engineering）係指騙徒利用人性嘅弱點，騙取受害人嘅信任，繼而騙取佢哋嘅帳戶名稱同密碼，手法多數係偽裝成受害人嘅親友、大型機構嘅職員，發放具威脅意味或者要求採取即時行動嘅訊息，再透過同受害人持續通訊，令佢哋放下戒心，誘使佢哋自願交出敏感資料。

例如喺疫情嚴重期間，外國出現唔少以疫苗或疫情相關資訊嘅社交工程攻擊電郵，試圖呃收件人點擊惡意連結。

要避免社交工程詐騙，就要謹記「小心駛得萬年船」嘅道理，避免同陌生人談論私隱細節。如果收到電郵查問個人敏感資料時，記住唔好心急，仔細驗證每一個請求，並要求聯繫者提供相關證明，保障自己。