【wepro小教室】勒索軟件

勒索軟件係黑客用嚟控制使用者電腦或加密資料嘅軟件病毒，成功之後就要求受害人畀贖金（多數會以加密貨幣作為贖款），先可以重獲資料或者正常營運。

一般嚟講，勒索軟件會以網路釣魚攻擊或者點擊劫持等方式作為入侵點，受害人一旦無為意安裝咗勒索軟件病毒入自己部電腦，就會無法存取電腦資料或使用電腦。當病毒入侵之後，就會喺裝置之間橫向散播。

加密攻擊係最常見嘅勒索軟件類型，受害人電腦上嘅所有檔案，都會被病毒加密，唔畀錢就唔解密，啲檔案就用唔到。另外仲有刪除威脅，換言之如果喺期限前未支付贖金，所有資料就會被刪除。

要避免勒索軟件攻擊，最好就係唔好亂咁下載不明電郵嘅附件，都唔好下載網絡上嘅不明檔案，亦要使用病毒偵測軟件掃描病毒。最重要係時刻保持警覺，唔好畀黑客有機可乘！