【wepro小教室】SASE

SASE（Secure Access Service Edge，安全訪問服務邊緣）係指一種現代網絡安全架構，基於雲端而設計，將網絡安全同網絡邊緣功能整合到一個平台，更安全、更簡化、更集成。

上次就同大家介紹咗 SD-WAN，其實 SASE 正正就係 SD-WAN 嘅下一步。事關 SD-WAN 可以畀分支地點直接存取雲端，會增加網絡嘅總攻擊面，為咗解決呢個問題，就有 SASE 嘅出現。

SASE 包括多種技術，例如 VPN、SD-WAN、安全 Web 閘道（SWG）、雲端存取安全性代理程式（CASB）、零信任網路存取（ZTNA）、防火牆即服務（FWaaS）。SASE 可以喺一個平台集成管理，亦支持喺任何位置同設備訪問應用程式同資源，唔再需要用傳統嘅 VPN 同硬件，可以提供較全面網絡安全保障，同時提高網絡連線效率，控制成本。

雖然 SASE 嘅架構係基於雲嘅，不過即使係冇用雲端服務嘅企業，都係可以用 SASE 嚟整合同管理各種網絡安全技術。