【wepro小教室】頂級域名

最近 Google 推出新頂級域名「.zip」引起網絡安全爭議，究竟「頂級域名」（Top Level Domain，TLD）係咩嚟呢？其實係指網站嘅網址最尾嘅部份，例如 .com、.org、.edu 等，係一個網站嘅重要標誌，代表緊網站嘅類型同用途。

即係好似你見到 .org 嘅網頁咁，你可能都會覺得佢係政府或非牟利機構網站。事實上， .org 代表「組織」，主要用喺慈善機構、政府、教育平台等非牟利網站，但呢個限制自 2018 年後就取消咗，之不過大眾對 .org 印象都係比較傳統，所以商業機構想用就要諗真啲喇。.org 佔全球網站總數只係 5%，要數到最多嘅，當然係最常見嘅 .com 啦，全球有 48% 嘅網站都係用緊佢。

以上幾款都係「通用頂級域名」（Generic Top Level Domain，gTLD），喺 1985 最早成立，屬於最常見嘅。不過因為實在太多網站喇，就好似大家嘅 login 名咁，成日同人撞名唔夠用，於是就有其他「頂級域名」出現。

大家都可能會見過 .hk、.jp、.cn、.tw 之類嘅頂級域名，呢類都係「國家及地區頂級域名」（Country Code Top Level Domain，ccTLD），代表企業業務嘅所在地或國家，由當地官方機構簽發。

至於「新通用頂級域名」（New Generic Top Level Domain，New gTLD）就係喺 2012 年新增嘅，企業可以自己申請，不分語言，例如 .app、.shop。