【CT Scan都入侵】AI 把關 防黑客竄改輻射劑量
CT Scan（電腦掃描）除咗可以用嚟確診癌腫瘤，亦可以用嚟檢查空心器官如心臟、肺嘅健康狀況。由於檢查過程要精準控制輻射照射劑量，減少對人體傷害，如果檢查系統被黑客入侵，分分鐘搞出人命。有研究團體就開發出一種 AI 技術，可以防止黑客喺輻射劑量上做手腳，準確度仲高達八成以上添！
新冠疫情期間，外國唔少醫療機構都受到網絡攻擊，大部分個案都係中咗勒索軟件，俾黑客偷走病人嘅私隱及加密系統檔案，唔算死得人。不過，如果 CT Scan 嘅輻射劑量被竄改就大件事喇，唔單只會誘發癌症，嚴重更有死亡風險。以色列 Ben-Gurion University 研究團隊最新發表報告，公開佢哋用 AI 打假嘅成果。團隊首先搵咗間 CT Scan 儀器供應商合作，輸入 1,991 宗檢查案例俾 AI，等佢分析喺檢查唔同年齡對象、位置及病例嘅情況下所需使用嘅輻射劑量，然後再喺一間醫院入面做測試。分析按兩方面進行，一個專門用嚟分析可疑嘅劑量指令，另一個就比較相同病例嘅使用設定，一旦發現檢查內容有問題，就會即時通報醫護人員，結果發現兩者嘅攔截成功率高達 82% 及 99%，團隊話唔單只可以對付網絡攻擊，仲連人為錯誤都一併消除，就咁睇真係值得應用喺 CT Scan 方面。
雖然呢啲醫療檢查器材大多數會離線操作，但黑客仍可以透過插 USB 手指入侵系統，特別係佢哋唔少都仲用緊舊嘅 Windows 系統，存在不少已知漏洞，所以都唔可以掉以輕心。事實上，研究團隊上年已試過用 AI 系統即時修改 CT Scan 影像，抹走或添加癌細胞，出嚟嘅結果更令放射師出現 9 成病情誤判，有可能令病人得唔到適當嘅治療，或令健康人士無辜捱刀。唔想成為受害者，真係要靠醫療器材供應商自律，喺設計系統時盡早考慮網絡安全因素，先可以避免慘劇發生。
