【語音誘罪】人工智能扮聲 成功呃走200萬港幣
單係電話騙案已經好難防備，如果再加埋人工智能嚟扮聲扮口音，中招風險肯肯定大增。以為好難攞到你把聲？少年，你太年輕了。
而家最多人討論嘅欺詐科技，一定係 Deepfake 技術，透過 AI 模擬技術，就可以令浸浸、朱克伯格等名人，喺影片中講出你想佢講嘅說話，要製造災難性假新聞真係一啲都唔難，跟車太貼嘅個案亦只會愈嚟愈多。不過，現階段模擬像真度都仲有啲瑕疵，小心留意絕對可以發現唔自然嘅地方。
語音分析提升像真度
如果唔睇畫面，淨係聽聲又如何？相信會仲多人中招。好似今年三月英國一間能源公司嘅 CEO，就因為收到德國母公司上司一通電話，就將 200 萬港幣轉咗去匈牙利供應商嘅戶口。呢個 CEO 事後話騙徒唔單只把聲同佢上司一模一樣，而且仲連語氣、口音都無分別，所以就咁上當，如果唔係對方幾分鐘內又再要求過數令佢起疑，隨時會二次中招添。
欺詐案調查專家 Rudiger Kirsch 喺收到承保嘅保險公司委托，經調查後發現今次唔單只係一般電話騙案，仲係加入咗人工智能元素。由於保險公司從未處理過同 AI 有關嘅個案，所以先搵佢幫手。佢話自己都測試過一啲黑客用嚟模擬語音嘅軟件，像真度極高，而且唔難買到，所以預期呢類騙案會大幅增加。
其實上年網絡安全公司 Pindrop 已發表過一份調查報告，指出由 2013 年至 2017 年期間，電話騙案嘅數字大幅增加咗 350%，Pindrop CEO Vijay 指出，配合機器學習及人工智能技術，電話騙案只會變得更複雜及難分真假。事實上，隨住結合語音助理功能嘅 IoT 產品愈嚟愈多，再加上銀行、保險公司傾向採用語音答話功能，只要採集呢啲語音數據嘅資料庫被黑客攻擊，而內裡又有齊個人私隱，黑客就好易用人工智能製作假嘅音效檔，向目標人士身邊嘅人發動電話騙案。
唔想咁易俾人呃？就要借助多啲方法去確認電話另一邊嘅人嘅身份，無論對方係咪你上司都好，始終謹慎保守都係為公司著想。
