【洩露行蹤】專家：唔用藍牙就閂咗佢啦！
除咗 Wi-Fi，我諗日常用得最多嘅無線科技，一定係藍牙！揸車嘅一日到黑都用藍牙免提唔在話下，就算好似我呢啲無車一族，都好鍾意用支藍牙遙控自拍棍影下相，或者駁部手機去藍牙喇叭聽下歌，但係藍牙有樣好衰嘅嘢，就係每次配對都好鬼蹝時間，所以一旦配對好，大部分人都會keep住由佢繼續用，咁就好易出事！
點解咁講？你睇下近期嘅新聞就知原因，首先係上個月喺拉斯維加斯舉行嘅黑客大會 DEF CON，就有參加會議嘅黑客示範點樣可以入侵唔同款式嘅藍牙喇叭，然後遙控佢播放高頻音效，邊個唔好彩身處喇叭附近就有機會聽覺受損，所以大會俾所有與會人士嘅建議只得一個：熄咗藍牙佢！
另一單就再嚴重啲，有研究員發現藍牙原來存有漏洞，傳送嘅數據可以俾黑客截取同埋改動藍牙傳送緊嘅內容，即使係一啲早已成功配對嘅產品，都可以喺配對後入侵，都係嗰句，你唯一可以做嘅，就係熄咗藍牙佢！
夠驚嚇未？未算！幾星期前，有研究員示範點樣利用 Bluetooth Low Energy 嘅運作方式，透過 AirDrop 拎到你個電話號碼；另外《紐約時報》亦揭發好多店舖裝咗藍牙接收器，只要你部手機開著藍牙，喺顧客唔知嘅情況下追蹤佢哋嘅行蹤，仲將呢啲數據賣俾廣告商……林林總總多不勝數，如果你唔想成為以上事件嘅受害者，都係一句，熄咗藍牙就最穩陣啦！
