【眼見未為真】人工智能持續進化 影片造假愈嚟愈真！
Fact check 真係好緊要，不過假新聞發佈速度咁快，唔係下下都 check 到。試諗下，新聞都咁難 Fact check，如果換成一條片，要睇下佢有無造假，就更加需要大量功夫啦！
科技發展得咁快，而家開個手機 app 都可以隨時換臉，要變成明星定一隻兔仔都冇難度，最火熱嘅話題叫 deepfakes，就算真人無講過佢說話，都可以用 A.I. 將影片加工，做到真嘅一樣。其中一個 deepfakes 高手德籍華人科學家黎顥，最近接受訪問時就話佢愈做愈驚，仲喺上月中國大連舉行嘅世界經濟論壇搞咗個攤位，俾嚟參加論壇嘅國家元首同富豪「體驗」一下換面係幾咁容易，希望藉此提醒佢哋關注 deepfakes 問題。
黎顥接受訪問時話，原來好細個已對電腦影像有興趣，12 歲睇《侏羅紀公園》，對電腦可以畫出世界上唔存在嘅恐龍表示非常震驚，所以佢一直立志要從事電腦影像嘅工作，喺端士讀完碩士就加入咗電腦影像行業，代表作係後前製作幫《狂野時速7》加入大量 Paul Walker 畫面，令拍攝中途過身嘅佢都可以「完成」埋部電影，「額外」喺超過 200 個畫面上現身。黎顥話自己入戲院睇時，已經分唔清楚邊個係真嘅 Paul Walker，而套戲亦相當成功，全球狂收 15 億美元票房。
嗰次之後，黎顥就更醉心研究「換臉術」，研發出唔靠黐貼傳統感應器嘅做法，單靠鏡頭就可以輕易實時換臉，呢個技術後來仲俾 Apple 買咗添！愈玩愈大，黎顥決定要做出最完美嘅 deepfakes，於是引入人工智能，透過運算幾秒鐘就可以將一張平面相，變成幾可亂真嘅3D立體模型，就算用手機拍攝，已可以控制 3D 模型跟你做表情……簡單講，即係你變咗另一個人！
本來呢啲技術用嚟玩下係無傷大雅，但之前已有好多影片示範美國總統、女星都變成 deepfakes 主角，後果可以好嚴重。今個月初，美國眾議院情報委員會已經去信 Facebook、Google 同埋 Twitter，問佢哋有乜應對 deepfakes 嘅方法，間間都只係回應密切留意中，未有具體方案。
雖然黎顥話發明咗個方法可以分辨條片係唔係 deepfakes，但係首先要有大量被扮演嘅人嘅相片同埋短片，同埋要極高規格嘅精密電腦運算一大輪先搞得清，老實講，檢查得嚟條假片都上晒網流傳緊，而最得人驚係 deepfakes 加入咗人工智能，佢會透過學習慢慢將影片質素愈做愈好，甚至做到冇乜瑕疵，要分辨真偽只會愈嚟愈難！
相關文章：【還原靚靚拳】Adobe 一鍵拆除 PS 裝甲 人工智能學習睇穿照騙
