【Catch Me if You Can】真主角慨嘆 今日犯案簡單4000倍
欺詐之神話而家呃人，容易過 50 年前 4000 倍，唔好問點解，信就得。
《Catch Me if You Can》（港譯《捉智雙雄》）呢套經典犯罪電影相信好多人都睇過，喺戲內由里安納度狄卡比奧（Leonardo DiCaprio）飾演嘅欺詐犯 Frank Abagnale，的確真有其人，多次利用人類心理漏洞扮成法語教師、醫生、律師、機師，又涉及偽造支票，被 FBI 逮捕及服役後，轉而為 FBI 服務及開設安全顧問公司，以自己嘅豐富詐騙經驗為企業進行培訓。
資訊發達「商機」處處
Frank 最近接受傳媒訪問時首先就話，造成資料外洩嘅唔係黑客，製造漏洞嘅永遠係受害者自己或公司員工，例如唔轉密碼、將唔應該拎走嘅工作帶返屋企做、無及時更新系統檔案、無做清楚身份核對就信以為真……各式各樣嘅前設令到人類掉以輕心，以為黑客唔會攻擊自己。Frank 話喺 50 年前並無咁多社交平台或科技，可以俾自己事先調查目標人物嘅背景、了解金融機構嘅運作情況，所有嘢都係靠電話同自己嘅口材去令人上釣，如果當時咁容易做到調查，佢話犯案簡單程度會暴增 4000 倍。Frank 特別提到佢而家雖然有為 Fortune 頭 500 位公司嘅 CISO 做培訓，但發現大部分呢啲專家原來唔熟悉基本網絡安全問題，所以難怪黑客攻擊事件可以經常發生。
另一個增加逮捕罪犯難度嘅因素係全球化，由於互聯網接通國際，罪犯可以經網絡喺唔同地方犯案，唔似得以前調查範圍大部分都可以收窄喺國內完成，就算係 FBI，要搵到罪犯身處地方都唔簡單。
數咗咁多問題，Frank 對提升網絡安全又有乜嘢建樹呢？佢話最近呢 5 年同政府致力研究消滅密碼，因為無論密碼點複雜都好，始終會有被盜取嘅風險，特別係提款機用嘅 6 位數密碼添！Frank 說而家美國某啲銀行已採用 Trusona 公司研發嘅無密碼提款系統，用戶只要拎住自己部有生物認證嘅手機，去到提款機前以專用 App 一掃屏幕嘅 QR Code，都可以進行提款。Trusona 公司曾經喺 2017 年獲 Microsoft 注資 1000 萬美元去研究呢種無密碼登入認證技術，可想而知安全性非常高。Frank 預計再過多兩三年美國銀行都會採用呢項技術，到時就可以消滅密碼帶嚟嘅漏洞喇。
相關文章：【專家主場】「資安英雄外傳」の黑客盛會創辦人 Jeff Moss
