【iOS 又出事】URL Scheme 漏洞 無料發放受害者帳戶登入權限
雖然 iOS 系統比較封閉，安全性一直較 Android 為高，但始終唔可能百分百安全，好似最近又被網絡安全專家發現，黑客可以利用一種名為 URL Scheme 嘅漏洞，透過惡意應用程式去盜取用戶登入其他應用程式，例如 WeChat 嘅個人資料，如果用戶一個唔留神，仲有可能幫黑客嘅消費找埋數添！
URL Scheme 基制提升客戶體驗
為咗防止應用程式暗中讀取其他應用程式嘅執行數據，Apple 喺 iOS 作業系統上利用咗沙盒（Sandbox）功能，將每個應用程式放置喺隔離空間執行，咁就可以防止互相讀取資料嘅行為。不過，為咗方便用戶喺用緊一個應用程式時，點擊一個功能鍵或網址連結就可以打開另一應用程式，或透過 Facebook、Gmail、WeChat 帳戶作為登入其他應用程式嘅認證，Apple 就喺 iOS 系統內設立咗一個名為 URL Scheme 嘅基制，舉個例，如果用緊 Joox 聽歌，想分享音樂推介去 WeChat 社交應用程式，用戶點擊分享連結按掣嘅背後，實際上就係連到「wechat://」呢個 URL，令到 Joox 可以有限度讀取到 WeChat 嘅登入資料，其他例子仲有 「fb://」、「facetime://」、「Whatsapp://」等等。
今次網絡安全公司 TrendMicro 發現嘅漏洞，就係通過 URL Scheme 去發動攻擊。專家以內地嘅蘇寧購物應用程式為例，正常情況下當用戶想利用 WeChat 帳戶登入蘇寧，蘇寧會先向 WeChat 發送登入要求，而 WeChat 就會向自家伺服器攞驗證金鑰，再發送俾蘇寧准許其登入。不過，由於 iOS 無限制應用程式唔可以利用人哋嘅 URL Scheme 嚟發送登入要求，所以黑客可以借助惡意程式發送上述蘇寧嘅登入要求，從而登入受害者嘅帳戶，進行各種非法行為，而用戶係一啲都唔知道發生緊乜事。
不過，又唔係每個應用程式都會出事，要達成上述攻擊方法，首要條件係 WeChat 並無驗證發送登入要求嘅應用程式真確性，其次係蘇寧每次發送嘅登入要求參數都係一樣，令到黑客可以複製呢啲參數去盜取資料，所以話以上呢個條件真係缺一不可。
專家指出黑客可以透過複製 URL Scheme 參數進行消費，例如盜取咗受害者嘅滴滴應用程式帳號兼搭完車後，將收費要求發送去受害者嘅手機上，雖然專家話一般情況下受害者唔會亂咁承諾付款，但如果快快手無睇到彈出嚟嘅訊息內容就㩒掣，咁就會代黑客找數。
至於用戶可以點樣減少中招率？基本上係無得防避，只能夠由應用程式開發商方面著手，提升驗證基制及隨機化登入要求嘅參數，咁就可以減少用戶被盜取帳號資料嘅風險。
相關文章：【Samsung 派福利】 GitLab 機密專案源碼任睇
