【韓劇迷小心！】殭屍病毒 GoBotKR 專攻韓劇迷
估唔到黑客都咁追得上潮流，連殭屍病毒都吹起韓風。最近有新品種殭屍病毒專攻南韓同埋中國嘅 Torrent 網站，主要針對韓劇種子嚟落毒，用家一唔留神就會中招。韓劇迷 BT 嘅時候要小心！
網絡安全品牌 ESET 嘅研究員發現新品種殭屍病毒，趁住韓劇、韓國電影甚至韓國遊戲大受歡迎，廣泛喺南韓同埋中國嘅 Torrent 網站落毒。只要網民打開咗有問題嘅 BT 檔，病毒就會喺受害者嘅電腦上打開後門，將電腦變成殭屍大軍嘅其中一員。研究員指出，該病毒其實係 2017 年爆發嘅 GoBot2 變種，由於變種元素主要針對韓國，所以就命名為 GoBotKR。
GoBotKR 通常以韓劇、韓國電影、遊戲嘅種子作包裝，爆開之後，就有幾個檔案，通常包括無毒嘅 MP4 檔、以 PMA 或 DLL 掩飾嘅有毒執行檔，以及用影像連結檔名包裝嘅有毒 link。雖然 MP4 檔無毒，不過通常收埋响唔同目錄之下，好容易就會錯誤地觸動有毒 link，而且條 link 通常係有片睇，受害人唔會咁容易發現中招。
GoBotKR 嘅目標係潛入電腦網絡系統，掌握系統訊息如 OS 版本、CPU 及 GPU 資料等，資料將會傳到 C&C 伺服器，用嚟作為發動大規模 DDoS 攻擊嘅預備兵力。
相關文章：【真係 Win Win？】盜版音訊編輯軟件 暗藏挖礦工具幫黑客搵錢
