【成就解鎖】破記錄 一個人洩盡厄瓜多爾全國人民私隱
一日到黑都聽到政府資料外洩，雖然都已經見慣，但就絕對唔可以習慣。最新一單係最近厄瓜多爾被揭發前所未有咁大規模嘅資料外洩，可以話係破盡所有國家嘅記錄。你估下到底有幾多人民嘅私隱洩漏咗？五成？七成？定係八成？錯！係100%，全國人民資料都外洩晒！
話說厄瓜多爾全國人口有 1650 萬人，今次洩漏出去嘅個人資料總共有 2000 萬人，點解會咁離奇？原來連之前已經離世嘅國民資料都洩漏埋，換句話講，舉國上下無人倖免，包括埋厄瓜多爾總統 Lenín Moreno，同埋 2012 年曾經受厄瓜多爾政治庇護、維基解密創辦人阿桑奇，都喺洩密名單入面，真係夠晒災難級！
事件係由一間叫做 vpnMentor 嘅網絡安全公司發現，漏洞源自美國邁阿密一個唔安全嘅伺服器，相信由厄瓜多爾公司 Novaestrat 所持有。調查發現，伺服器入面 18GB 個人資料唔係得人名咁簡單，仲有埋出生日期、出世地點、住址、電郵、身份證號碼、職業、銀行賬戶狀態、結餘，同埋信用類別。
咁大件事，梗要搵人問責，當地警方已經率先拉咗 Novaestrat 嘅經理 William Roberto G，帶走埋佢所有電腦同埋電子裝置去調查，最諷刺係當地電訊部門過去八個月正喺度搞緊立法，以保障市民個人資料。不過法例都未立就爆單咁嘅嘢，真係唔知點收科。翻查記錄，最勁一次嘅國民資料洩露，係今年 7 月東歐國家保加利亞，一共流出咗七成國民嘅個人同埋財務資料，但兩個幾月就俾「國」打破咗喇！
