【Nintendo 代碼外洩】竟無意發現 Mario 未出世嘅隱藏兄弟角色？

分享FacebookTwitterWhatsAppEmailLinkedinTelegram

「喂，聽講 Nintendo 又 Data Leak 喇。」「好出奇咩？ Switch﹑Wii 定 3DS？」
「唔係阿…係 N64﹑Game Boy 同 Super NES…」「…呢三部野加埋老過我阿媽架喇喎，仲有人走去搵漏洞？」

冇錯，就係有。相隔（唔係好）多年，任天堂再次因漏洞而洩漏數據。但好彩嘅係，今次唔係用戶資料﹑帳號密碼等私人嘢，而代碼洩漏，甚至引出 Super Mario 64 入面本未出現嘅設計同角色。

話說當年原版嘅 Super Mario 64 只有單人模式。開發者本來都有打算加入雙人模式 — 喺同一個畫面上面分別操控兩個角色去通關嘅。不過當時 Nintendo 趕住將遊戲面世，就冇加到呢個模式入去，但係角色嘅設計同模組就以破碎嘅形式殘留喺 Code 入面。

話就話本來唔應該出現，其實呢個角色，一講出嚟大家都唔陌生 — 一個 3D 版嘅 Luigi 。除咗佢之外，仲有 Legend of Zelda Link 最初嘅模型﹑一隻老嘅 Yoshi 設計圖﹑冇用到嘅 Pokemon 等等等等。如果你係 Nintendo 忠實 Fans ，呢次事件就真係畀到驚喜你。但「彩蛋」背後，其實代表住一場極度大規模嘅 Data Breach，同埋 Nintendo 喺安全問題上嘅不足。

從早前 16 萬 Nintendo 用戶帳號被盜，到 Wii 完整代碼同 N64 技術 demo 流出，再到今次嘅 ”gigaleak”大型代碼洩漏，Nintendo 作爲深受大眾愛戴的國際上市公司，一次又一次忽視用戶資料及安全問題，實在係爭咁 D 誠意。直到而家，Nintendo 都仲未對事件作出回應，長期以往，只會令廣大用家對佢失去信心，希望佢地明白對用戶資料嘅責任，重視安全問題挽回形象啦。

資料來源︰https://bit.ly/30A2Oug

唔想錯過熱門網絡保安消息，請即訂閱 wepro180 電子周報：https://bit.ly/2ZcCi9J