【唔係錢咁簡單】二五仔認錯大爆 Twitter Hack 內幕，牽涉地下黑市？
看似一場無中生有嘅鬧劇，一夜之間驚動全球嘅 Twitter Hack，又突然音訊全無。幕後黑手消聲匿跡，暫時仲未有任何機關搵到佢。就好似我地上次所講，呢個 Hacker 嘅實力非常強大。可能在人性嘅驅使之下，昔日嘅同事竟然企出嚟接受訪問，帶大家認識呢場血腥風雨嘅內情。
接受訪問嘅 Hacker 分別自稱 “lol”同“ever so anxious”，並供出佢地「幕後大功臣」嘅名 —— “Kirk”。佢地向記者坦然承認自己有參與初期嘅攻擊，但係就冇份去 hack 好似 Elon Musk 呢啲大人物。lol 又指出，當初接觸 Kirk 係喺 Discord 上面 (由此可見discord嘅潛在危機）。Kirk 自稱佢喺 Twitter 做野，可以控制﹑登陸同管理任何人嘅 account。作為一個行家，lol 當然唔會信佢自稱管理員嘅假身份，不過控制 Twitter 嘅版面又實實在在，令佢對 Kirk 嘅技術嘆為觀止。
呢度要講下，今次呢班三唔識七嘅 Hacker 點解會聚起嚟。世上有一種 Hacker 對所謂 “OG” (Original Gangster)嘅 User Name 情有獨鍾，好似@6、@y 呢 D 一早就俾人用咗，又非常簡單嘅名。lol 同 ever so anxious 就係其一，而呢 D「OG 狂熱者」通常就會喺 OGusers.com 呢個網站進行交易 —— 至於得手方法，唔通原用家真係走去賣咩。
得知 Kirk 有幾勁之後，lol 連同 ever so anxious 就開始同佢合作，作為一個中間人嘅角色販賣 Username。Kirk 仲幫 ever so anxious hack 咗佢垂涎已久嘅 Username @anxious。佢地一路 hack，一路賣，都非常順利，冇搞出咩大事嘅 —— 直到 lol 同 anxious 話要休息，兩位下線之後，Kirk 嘅野心仲未滿足 — 隨即就 Hack 咗 CoinBase﹑Apple 同其他名人嘅 Account，接下落嚟嘅事，大家都耳熟能詳啦。
兩名 Hacker 喺訪問入面自首，仲話對 Kirk 嘅行為好失望。「佢搞咁多野，只係為咗 20 個 bitcoin (約 140萬港元 )。」雖然事件嘅由來已經查清，兩名 Hacker 都公開咗佢地分別住喺美國西岸嘅 90 後同住喺英國嘅 19 歲青年呢個身份，但係對於始作俑者 Kirk 既資料仍然一無所知。佢喺黑客嘅圈子默默無名，直到 7 月 14 號先建立一個 Discord account，然而都已經消失咗。就好似徐志摩筆下嘅人物一樣 — 悄悄的他走了，正如他悄悄的來。
唔想錯過熱門網絡保安消息，請即訂閱 wepro180 電子周報：https://bit.ly/2ZcCi9J
