【共享車資】Mercedes-Benz「交友」app 睇到其他車主位置同電話
而家乜都講智能，手機如是、家居如是，所以又點少得車呢？而最容易令座駕變得智能嘅做法，就係幫架車出隻 app，用嚟管理行程、汽油零件損耗，甚至當作車匙用嚟開閂門同撻車，好似 Tesla、Mercedes-Benz 都有為車主推出專用 app。而今次車主資料外洩事故，就發生喺後者身上嘞。
美國西雅圖一位 Mercedes-Benz 車主，早前喺打開自己手機內嘅專用 app 時，發現除咗佢嘅個人帳戶資料之外，竟然仲睇到其他 Mercedes-Benz 車主嘅帳戶資料，而且呢啲個人資料包含車主嘅姓名、電話、地址、電郵、保險幾時到期等等，當然仲有架車嘅位置都睇到啦！另一位車主亦發現相同情況，佢仲嘗試用上面嘅電話聯絡另一位車主，發現佢都有呢個問題。呢次真係提供咗一個好好嘅途徑俾 Mercedes-Benz 車主聯誼，甚至組織車會都得啦！講笑啫，其實呢班車主當然陷入恐慌，因為呢隻專用 app 唔單只包含個人私隱，仲可以用嚟遙距解門鎖以及當 Keyless Go 車匙，不過好在經車主測試過後，解鎖同撻車呢兩項功能都應用唔到喺其他車主嘅車上，叫做唔怕俾人偷走架車。
刪app不如刪帳戶
Mercedes-Benz 收到查詢後，母公司 Daimler 嘅發言人回應話暫時仲調查緊到底發生乜嘢問題，但就強調入面顯示嘅只係暫存資料，唔係架車嘅實時位置同埋無任何信用卡之類嘅財政資訊外洩。
根據 Google Play 嘅資料顯示，呢隻 app 有專過 10 萬人下載，不過問題喺幾個鐘內已經被修復，相信受影響嘅車主唔多。最搞笑係其中一位車主打上 CS 問時，職員竟然建議佢即刻刪除咗隻 app，須知道 app 雖然可以刪除，但用戶資料其實都仲 keep 喺資料庫內，除非車主刪除整個帳戶，否則都係無用㗎！計我話，如果自己無私人車庫，只要架車有呢啲智能撻車功能，最好都係架多把軚盤鎖，增加偷車難度同時間，賊人都會識揀其他容易入手嘅車嚟偷。
